Ангрен шаҳрида пора олган ИИБ терговчиси қамоққа олинди. Бу ҳақда ДХХ матбуот хизмати хабар берди.  Тошкент вилояти Ангрен шаҳар Ички ишлар бошқармаси ҳузуридаги Тергов бўлими катта терговчиси ўз иш юритувида бўлган терговга қадар текширув иши доирасида фуқарога нисбатан жиноят иши қўзғатмаслик ва тегишли тартибда чора кўрмаслик эвазига 10 минг доллар талаб қилган. Давлат хавфсизлик хизмати ва Бош прокуратура ҳузуридаги Департамент ҳамда Ички ишлар вазирлигининг шахсий хавфсизлик бош бошқармаси ходимлари ҳамкорлигида ўтказилган тезкор тадбирда у сўралган пулдан 5 минг долларни олган вақтида ашёвий далиллар билан ушланган.

Ҳолат юзасидан терговчига нисбатан Жиноят кодексининг 210-моддаси (пора олиш) 2-қисми “б” банди билан жиноят иши қўзғатилиб, “қамоқ” эҳтиёт чораси қўлланилди. Ҳозирда тергов ҳаракатлари олиб борилмоқда. Жиноят кодекси 210-моддасига кўра, пора олиш БҲМнинг 50 бараваридан 100 бараваригача миқдорда жарима ёки муайян ҳуқуқдан маҳрум этилган ҳолда 2 йилдан 5 йилгача озодликни чеклаш ёхуд 5 йилгача озодликдан маҳрум қилиш билан жазоланади.

• ДХХ
• ИИБ
• Пора
• Toshkent viloyati