АҚШнинг Нью-Йорк шаҳрида 2017 йил 31 октябрь куни теракт амалга ошириб, 8 нафар кишини ўлдирган ўзбекистонлик Сайфулло Соипов 13 март куни АҚШ федерал суди томонидан умрбод озодликдан маҳрум қилинди. Бу ҳақда АҚШ Адлия департаменти маълум қилди.

Соипов Сайфулла Хабибулаевич Тошкент молия институтини тамомлаб Тошкентдаги меҳмонхоналардан бирида ҳисобчи лавозимида ишлаган.

АҚШга кетгунига қадар жиноий жавобгарликка тортилмаган ва ҳуқуқни муҳофаза қилиш органлари эътиборига тушмаган.

2010 йилда Соипов грин-карта лотореясини ютиб олади ва шу йилнинг ўзида АҚШга кетади. Сўнгги бир неча йил давомида у ўша ерда вақтинча яшаб келаётган Ўзбекистон фуқароси бўлган аёл билан шаръий никоҳда бўлган.

Ўтган вақт ичида Соипов бирор марта Ўзбекистонга келмаган ва Тошкентда яшаётган ота-онаси билан учрашмаган.

«Сайфулло Сойипов саккиз одамнинг қотили ва яна кўплаб оилаларни чексиз уқубатда қолдирган шахс. Бу даҳшатли террор ҳужуми.

У ИШИДга содиқ экани ва айнан мана шу террорчилик гуруҳига кириш учун бу ишларни амалга оширганини ҳужум пайтида ҳам ва бутун суд давомида айтиб турди», — деди Федерал прокурор Демиен Уилямс.

Сойипов ҳужумни ижарага олинган юк машинасида қилган. У Нью-Йорк марказидаги кўчада ёппасига 20 кишини босиб кетган.

Жароҳатланганлар орасида тана аъзоларидан айрилган, руҳан ва жисмонан ногирон бўлиб қолганлар, хусусан, 14 ёшли ўсмир ҳам бўлган.

• АҚШ
• Теракт