“Жума куни “хориждаги операция зонаси”да “ҳарбий топшириқ”ни бажарган муҳандис-сапёрлар бўлинмаси КХДРга қайтди”, – дея хабар берди Корея Марказий телеграф агентлиги.

Пхенянда ҳарбийларни мамлакат етакчиси Ким Чен Ин шахсан кутиб олди. У нутқида сапёрлар Россиянинг Курск вилоятида фаолият олиб борганини айтди.

“Ҳарбийларимиз мўъжиза кўрсатди. Улар энг қисқа муддатда, 3 ойдан кам вақт ичида, ҳатто бир неча йил давомида ҳам зарарсизлантириш қийин бўлган кенг ҳудудни хавфсиз маконга айлантирди”, — деди Ким Чен Ин.

Шимолий Корея етакчисининг сўзларига кўра, муҳандис-сапёрлар бўлинмаси Россияда 120 кун фаолият юритган, улардан тўққиз нафари ҳалок бўлган.

Одатда КХДР расмийлари Шимолий Корея ҳарбийларининг Россияни Украинага қарши урушида иштироки ҳақида бевосита гапирмайди, бунда “хориждаги операция” деган умумий иборалар билан чекланади. КХДР шу йил апрель ойида илк бор Россия томонида жанг қилиш учун ҳарбийларини юборганини тасдиқлаганди.

Жанубий Корея разведкаси маълумотига кўра, Пхенян Россияга қарийб 15 минг аскарини юборган, улардан тахминан 6 минг нафари ҳалок бўлган.

• Ҳарбий хизматчилар
• КХДР
• Kim Chen In
• Россия
• Украина
• Уруш