НАТО Бош котиби Енс Столтенберг Украинага ҳарбий ёрдамни кучайтиришга чақирди. Бу ҳақда Норвегия корхоналар конфедерациясининг Ослода бўлиб ўтган йиллик конференсияси якунлари бўйича тарқатилган НАТО матбуот хизмати баёнотида айтилади.

У Украинани қўшимча қуроллар билан қўллаб-қувватлаш муҳимлигини таъкидлаган. Алянс бош котибига кўра, қурол-яроғ тинчликка эришишнинг ҳақиқий йўлидир.

“Аслида қурол-яроғ тинчликка йўл”, дейди Столтенберг.

Ташкилот баёнотида қайд этилишича, Столтенберг “иттифоқчиларнинг мудофаага кўпроқ сармоя киритиши, авторитар режимларга қарамликни йўқотиши, эркинлик ва демократия учун бирга туриши зарурлигини таъкидлаган”.

Унинг таъкидлашича, Россия ва Украина ўртасидаги уруш тугаган тақдирда ҳам, НАТО ва Москва орасидаги зиддият сақланиб қолади.

“Москвадаги режим бошқа Европани хоҳлайди. Қўшни давлатларни назорат қилишни истайди ва демократия ва эркинликни таҳдид деб билади. Бу Россияни Ғарб билан доимий зиддият ҳолатига қўяди. Шундай экан, бу уруш тугаса ҳам, Россия билан муносабатларимиздаги муаммолар сақланиб қолмоқда”,– дейди НАТО Бош котиби Енс Столтенберг.

• Bosh kotib
• НАТО
• Қурол
• Россия
• Украина