Туркманистонда ўзбекистонлик “криминал авторитет”, айни вақтда ҳибсда сақланаётган “Бахти Ташкентский”нинг дўсти қўлга олинди. Бу ҳақда “Хроника Туркменистана” интернет-нашри хабар берди.

Маълум қилинишича, Бахтиёр Қудратуллаев ва унинг дўстлари “Долзарб 40 кунлик” тадбири доирасида қўлга олингандан сўнг, жиноий гуруҳ аъзоларидан бири 7 декабрь куни Туркманистон билан чегарани ноқонуний кесиб ўтиб, қочишга муваффақ бўлган.

Туркманистон Миллий хавфсизлик вазирлигига қочқиннинг қўлга олинган гуруҳ аъзоси Наргиза Жуманиёзованинг синглиси Бибижон Жуманиёзованинг уйида эканлиги ҳақида маълумот берилган.

Тезкор қидирув натижасида эркак қўлга олинган, сўнгра “Шовот” чегара божхона постида Ўзбекистон махсус хизматларига топширилган. Бибижоннинг уйидан жиноий гуруҳ аъзосидан ташқари Ўзбекистонда ишлаб чиқарилган 12 қути дори воситалари топилган.

Аниқланишича, аёл дори воситалари контрабандаси билан шуғулланган. Айни вақтда унга нисбатан жиноий иш қўзғатилган. Эслатиб ўтамиз, “Бахти Ташкентский” номи билан танилган Бахтиёр Қудратуллаев жорий йилнинг декабрь ойида қўлга олинганди.

• ИИБ
• JK
• Туркманистон