АҚШ президенти Жо Байден Исроил бош вазири Бинямин Нетаняхунинг Ғазо секторидаги ҳаракатларини хато деб атади.Бу ҳақда “Анадулу” хабар берди.

 “Менимча, унинг қилаётган иши хато. Мен унинг ёндашувига қўшилмайман”, деди Оқ уй раҳбари АҚШда испан тилида кўрсатувлар олиб борувчи “Univision” телеканалига берган интервьюсида.

 Байден Исроилни Ғазода зудлик билан ўт очишни тўхтатиш ва эксклавга гуманитар ёрдамнинг тўсиқсиз киришини таъминлаш учун чоралар кўришга чақирди.

 “Одамларнинг соғлиғи ва озиқ-овқатга бўлган эҳтиёжлари қондирилмаслигини оқлаб бўлмайди. Бу зудлик билан амалга оширилиши керак”, - деди АҚШ президенти.

Жо Байден 4 апрель куни Исроил Вазирлар Маҳкамаси раҳбари билан телефон орқали суҳбатда “Ғазода зудлик билан ўт очишни тўхтатишни таъминлаш” зарурлигини таъкидлади ва Исроилни “ўт очишни тўхтатиш бўйича чора-тадбирлар кўришга” чақирди.

 Оқ уй раҳбари, шунингдек, Исроилнинг World Central Kitchen (WCК) халқаро гуманитар ташкилотининг 7 нафар ходимини ўлдиргани масаласини ҳам кўтариб, минтақада фаолият юритаётган WCK ва гуманитар ёрдам ташкилотларига ҳужумларни қабул қилиб бўлмас деб атади.

• Байден
• Isroil