Маълум бўлишича, 2022 йил 22 январ куни эрталаб биткоин нархи 2021 йил 24 июлдан бери минимум қийматни янгиланиб, 35,1 минг долларни ташкил этган. Жумладан, ўтган икки кеча-кундузда биринчи рақамли криптовалюта нархи 9 фоизга арзонлашгани қайд этилган.

Шунингдек, биткоин нархи жорий йил 20 январ куни кечқурун унинг курси 43,5 минг доллардан ошиб кетгач кескин пасайишни бошлаган. 2021 йил 10 ноябрда белгиланган тарихий максимал – 69 минг доллардан криптовалюта 48 фоизга – деярли ярмига арзонлашган.

Маълум бўлишича, криптовалюта бозоридаги пасайиш S&P 500 индексининг қисқариши билан боғлиқ бўлиши мумкин, ушбу индекс 20 январдаги савдо сессияси натижаларига кўра 1 фоизга, 21 январда эса яна 2 фоизга пасайишда давом этган. 

Таъкидланишича, 2022 йил 21 январ давомида капиталлашув бўйича энг йирик алткоинлар ҳам кескин пасайиши кузатилган. Ethereum ва Binance Coin’нинг нархи ҳар бири 14 фоизга пасайиб, мос равишда 2,4 минг доллар ва 353 долларни ташкил этган. Ўнта энг қиммат криптовалюталар орасида Luna энг кўп зарар кўрган – унинг нархи 27 фоизга тушиб, 57 долларни ташкил этган.

Бундан ташқари, 20 январ куни Россия банки мамлакатда криптовалюталар эмиссияси, уларни муомалага чиқариш ва айирбошлашни тақиқлаш таклиф қилинган ҳисоботини эълон қилган эди. Банк шунингдек, рақамли активлар майнингини тақиқлаш ва хорижий савдо майдончаларида криптовалютадаги рус сармояларини кузатишни бошлаш зарур деб ҳисоблаши ҳақида хабар берган.

• bitcoin