Ўзбекистонга янги турдаги синтетик гиёҳвандлик воситаси — “клефедрон”ни олиб киришга уриниш божхоначилар томонидан тўхтатилди.

Маълумотларга кўра, 31 ёшли такси ҳайдовчиси нотаниш шахслардан 2 дона “редуктор” авто эҳтиёт қисмини 200 доллар эвазига қабул қилиб, “Навоий” чегара божхона постига етказиб берган. Редукторларни пост орқали ўтказиш учун эса 1989 йилда туғилган фуқарони 150 минг сўмга жалб этган.

Товарлар назорат-рентген қурилмасида шубҳали акс этгани боис, улар белгиланган тартибда кўздан кечирилган. Натижада ҳар бир редуктор ичига 3 тадан, жами 6 та ўрам яширилгани аниқланди. Экспертизага кўра, ўрамлардан салкам 5 килограмм “клефедрон” синтетик гиёҳвандлик моддаси чиққан.

Тезкор тадбир доирасида эҳтиёт қисмларини қабул қилиб, занжирнинг сўнгги бўғинига етказиши керак бўлган курьер ҳам Тошкент шаҳрининг Яшнобод туманида қўлга олинган. Курьер 2 та телефон рақами орқали “Виталий” деб таништирилган шахснинг кўрсатмасига биноан моддаларни икки нафар фуқарога топшириши керак бўлган. Улар “товар”ни пойтахтдаги 5 та манзилга тарқатишни режалаштирган.

Айниқса, такси ҳайдовчиси, ташмачи ва курьер эҳтиёт қисмлари ичида синтетик модда борлигидан бехабар бўлгани маълум қилинди. Аммо бу ҳолат уларни жавобгарликдан озод этмайди.

Президентнинг 3 ноябрдаги фармонига мувофиқ, уюшган гуруҳ томонидан гиёҳвандлик воситаларини трансчегаравий тарзда ўтказиш учун 20 йилгача озодликдан маҳрум қилиш жазоси белгиланмоқда.

Ҳодиса юзасидан Жиноят Кодексининг 246- ва 273-моддалари билан жиноят иши қўзғатилган.

• Божхона
• Гиёҳвандлик
• Жиноят