“Хабарингиз бор, Лазиз Муллажонов Ўзбекистон миллий терма жамоаси аъзоси, Париж-2024 Олимпия ўйинлари олтин медаль соҳиби ҳисобланади.

Ижтимоий тармоқларда боксчида допинг моддаси аниқлангани ва бунинг натижасида Париж-2024 Олимпия ўйинлари олтин медали натижаси бекор қилиниши тўғрисида тасдиқланмаган хабарлар тарқалмоқда.

Ўзбекистон бокс федерацияси шуни маълум қиладики, бугунги кунда Муллажонов профессионал боксда ўз фаолиятини давом эттирмоқда. Спортчимиз доимий равишда допинг қоидаларига риоя қилиб келган ва допинг тестлари натижалари ҳар доим манфий чиққан бўлиб, жорий йилнинг 11 июнь куни Халқаро допинг қоидаларига кўра, спортчимиздан допинг тести олинган ва унинг натижаларига кўра, тақиқланган моддалар борлиги аниқланганлиги юзасидан Халқаро допинг агентлиги томонидан ахборот хати тақдим қилинди.

Спортчимиз Париж-2024 Олимпия ўйинларидан сўнг, 2024 йил 19 ноябрь куни Фарғона шаҳридаги хусусий шифохонада соч кўчириб ўтказиш амалиётини ўтказгани сабабли, 4 босқичли операция амалиётида ва операциядан кейинги муолажаларда шифохона томонидан тақдим қилинган даволаниш учун дори воситаларини қабул қилганлиги ва ушбу дори воситаларида айрим тақиқланган допинг моддалари бўлиши мумкинлиги тахмин қилинмоқда.

Ўзбекистон бокс федерацияси ва Лазиз Муллажонов томонидан Халқаро тест агентлигига ушбу масала юзасидан керакли барча ҳужжатлар тақдим қилинган бўлиб, ҳозирда якуний қарор чиқиши кутилмоқда.

Ижтимоий тармоқларда вакилимиз допинг қоидаларини бузганлиги сабабли Париж-2024 Олимпия ўйинлари олтин медали натижаси бекор қилиниши тўғрисида хабарлар асоссиз эканлиги ва юқоридаги ҳолат Олимпия ўйинларидаги натижасига ҳеч қандай таъсир кўрсатмаслигини маълум қиламиз.

Шу ўринда ОАВ вакилларидан маълумотларни текширмасдан Ўзбекистон бокс федерацияси ва бевосита Муллажонов билан боғланмасдан олдин асоссиз маълумотларни тарқатмасликларини сўраймиз” – дейилади федерациянинг расмий ахборотида.

• Баёнот
• Бокс
• Спорт
• korxona va tashkilotlar