Бугун Сербиянинг Ниш шаҳрида бокс бўйича аёллар ўртасидаги жаҳон чемпионатининг сўнгги ҳал қилувчи финал беллашувлари ўтказилади.

Чемпионатнинг финал баҳсида фақатгина бир нафар ўзбекистонлик спортчи – Навбаҳор Ҳамидова иштирок этади. Боксчи -66 кг. вазн тоифасида олтин медаль учун ўтадиган рақобатда туркиялик Бусеназ Сурменега қарши рингга кўтарилади.  

Куни кеча жаҳон чемпионатининг финал жанглари олдидан боксчилар ўртасида нигоҳлар тўқнашуви бўлиб ўтди.

Шунингдек, кеча дунё биринчилигида чорак финалда юришини тўхтатган боксчилар 10 минг АҚШ доллар пул мукофоти билан тақдирланди. Ушбу тақдирлаш маросимида Ситора Турдибекова, Соҳиба Рўзметова, Нигина Ўктамова ҳамда Азиза Зокирова каби Ўзбекистон чарм қўлқоп усталари ҳам иштирок этди ва пул мукофоти билан тақдирланди.  

Маълумот учун, IBA томонидан ўтказилаётган жаҳон чемпионатида олтин медаль соҳиблари 100 минг АҚШ доллари пул мукофоти билан тақдирланади. Кумуш медаль учун эса 50 минг, бронза медалига 25 минг АҚШ доллари берилади. Мусобақа тарихида илк бор чорак финалга чиққан барча спортчилар 10 минг АҚШ доллари билан рағбатлантирилади.

• Бокс
• финал
• Жаҳон чемпионати
• Сербия