Россия президенти Владимир Путин икки кунлик ташриф билан Ўзбекистонга келади ва Президент Шавкат Мирзиёев билан музокаралар ўтказади. Бу ҳақда “ТАСС” хабар бермоқда.

Ташриф Путиннинг 7 май куни инаугурация маросимидан сўнг учинчи хорижга сафари ҳисобланади. Ташриф давлат мақомига эга бўлиб, бу ташрифнинг энг юқори шакли ҳисобланади.

Кремль матбуот хизмати хабарига кўра, Путин ва Мирзиёев Россия-Ўзбекистон муносабатлари, стратегик шериклик ва иттифоқчиликнинг ҳозирги ҳолати ва ривожланиш истиқболларини муҳокама қилади. Шунингдек, долзарб минтақавий муаммолар юзасидан фикр алмашадилар.

Президентлар Россия ва Ўзбекистон минтақалар кенгашининг биринчи йиғилишида иштирок этади. Бундан ташқари, бир қанча қўшма ҳужжатлар имзоланади. Путиннинг Ўзбекистондаги илк тадбирлари якшанба оқшомига белгиланган.

Одатда давлат ташрифи икки шаҳарга ташрифни ўз ичига олади, лекин бу сафар Путин фақат Тошкентга ташриф буюради. Россия Федерацияси Президентининг ёрдамчиси Юрий Ушаков бу масалани томонларнинг эҳтиёжларига қараб мослашувчан тарзда ҳал қилиш мумкинлигини таъкидлаган.

Путин Ўзбекистонга сўнгги бор 2022 йил сентябрда Шанхай ҳамкорлик ташкилоти саммитида қатнашиш учун келган эди.

Президентлар мунтазам равишда, жумладан, 21 май куни телефон орқали мулоқот қилишган.

• Мирзиёев
• Путин