FIFA диссиплинар қўмитаси “Бунёдкор” клуби ва жамоанинг собиқ ўйинчилари Ривальдо ҳамда Денилсон ўртасида узоқ давом этаётган молиявий тортишув бўйича қарор қабул қилди.

Tribuna.uz манбаси тақдим этган ҳужжатларга кўра, FIFA “Бунёдкор” клубининг Ривальдо олдидаги қарздорлиги – 8,1 миллион евро, Денилсон олдидаги қарздорлик – 1,1 миллион евро маблағни тўлаш бўйича қарорни Ўзбекистон футбол ассоциациясига юборган.

ФИФА тартиб-интизом қўмитаси аъзолари 22 февраль куни “Бунёдкор” клуби ва бразилиялик ўйинчилар ўртасидаги мазкур иш бўйича қарорни қабул қилган. ФИФА қарорида қуйидагилар маълум қилинган:
“Бунёдкор” ва Ривальдо ўртасидаги иш бўйича:
1. “Бунёдкор” клуби ФИФА низоларни ҳал қилиш палатасининг 2017 йил 21 сентябрда қабул қилган қарорини тўлиқ бажармаганликда айбдор деб топилган. Бу Спорт арбитраж суди томонидан 2023 йил 6 ноябрда чиқарилган қарорда тўлиқ тасдиқланган.

2. “Бунёдкор” клуби FIFA низоларни ҳал қилиш палатаси ва САС қарорига кўра, Ривалдо Витор Борба Феррейрега қуйидагиларни тўлаши шарт:

2 489 947 евро – клуб томонидан бразилиялик футболчига тўланмаган мукофот пули ҳамда йиллик 5 фоиз устама;
5 664 000 евро – шартнома бекор қилиниши сабабли товон пули ҳамда йиллик 5 фоиз бонус.
10 минг Швейцария франки – арбитраж суди жараёнида харажатлар учун товон пули.

“Бунёдкор” ва Денилсон ўртасидаги иш бўйича:

1. “Бунёдкор” клуби ФИФА низоларни ҳал қилиш палатасининг 2017 йил 21 сентябрда қабул қилган қарорини тўлиқ бажармаганликда айбдор деб топилган. Бу Спорт арбитраж суди томонидан 2023 йил 6 ноябрда чиқарилган қарорда тўлиқ тасдиқланган.

2. “Бунёдкор” клуби Денилсон Мартинш Насиментога қуйидагиларни тўлаши шарт:
700 000 АҚШ доллари – клуб томонидан бразилиялик футболчига тўланмаган мукофот пули ҳамда йиллик 5 фоиз устама;
400 000 АҚШ доллари – келишув шартлари бузилганлиги учун товон пули ҳамда йиллик 5 фоиз бонус.
10 минг Швейцария франки – арбитраж суди жараёнида харажатлар учун товон пули.

Қайд этилишича, FIFA томонидан “Бунёдкор” клубига 30 кун ичида ушбу маблағни тўлаш муҳлати берилган. Акс ҳолда ташкилот томонидан тегишли чоралар кўрилиши маълум қилинган. Шунингдек, ҳар икки футболчи бўйича “Бунёдкор” клуби 30 000 минг швейцар франки миқдорида жаримага тортилган.

Эслатиб ўтамиз, Ривальдо 2008-2010 йиллар давомида “Бунёдкор” клуби шарафини ҳимоя қилиб, уч карра Ўзбекистон чемпиони бўлган эди. Денилсон эса 2010 йил Тошкент клуби сафида чемпионликка эришган, Олий Лигада 14 ўйинда 4 та гол, ОЧЛда эса 6 ўйинда 5 та голга муаллифлик қилганди.

• Бунёдкор
• FIFA