7-октябрь куни Лионел Месси Аргентина терма жамоаси сафидаги сўнгги учрашувини ўтказди. Бенин терма жамоасига қарши баҳсда аргентиналиклар 3:0 ҳисобида ғалаба қозонди. Месси учала голда ҳам бевосита иштирок этиб, бир гол ва икки голли узатмага муаллифлик қилди.

Аргентина 48-дақиқада ҳисобни очди. Месси бурчак тўпини узатганидан сўнг Николас Отаменди ҳаводаги зарба билан гол урди. Мазкур учрашув Отаменди учун ҳам Аргентина терма жамоасидаги сўнгги баҳс бўлди.

61-дақиқада Месси Ники Пасга голли узатма берди. Орадан 10 дақиқа ўтиб, 39 ёшли футболчи пеналтини аниқ амалга ошириб, ҳисобни 3:0 кўринишига келтирди.

Учрашувдан сўнг Месси терма жамоадан кетиш унга оғир бўлишини айтди. ТйC Спортс унинг сўзларини келтирган.

«Бугун нимадир дейиш қийин. Ҳиссиётларга тўлиб кетганман, хаёлимда жуда кўп фикрлар айланяпти. Биринчи бўлиб отам хаёлимга келди.

Мен қила оладиган ягона нарса – хайрлашув нутқимда айтганимдек, барчага миннатдорчилик билдириш. Бу футболкани 20 йилдан ортиқ кийиш мен учун катта шараф бўлди. Ҳатто энг қийин пайтларда ҳам курашишдан тўхтамадим, доимо бор кучимни сарфладим. Терма жамоадан кетиш мен учун жуда оғир бўлади. Қасам ичаманки, бу ерга абадий келишни истардим. Чунки Аргентина терма жамоасида ўйнаш – инсоннинг бошидан кечириши мумкин бўлган энг яхши нарса», деди Месси.

Футболчи, шунингдек, Аргентина терма жамоасини танқид қилганлар ҳақида ҳам фикр билдирди. У жамоанинг муваффақиятсизлигини истайдиганлар борлигини таъкидлаб, 2022-йилги жаҳон чемпионатидаги ғалабани мухлислар билан нишонлаганини ёдга олди.

Месси Аргентина терма жамоасидаги дебютини 2005-йилда ўтказган. У фаолияти давомида 208 та учрашувда 126 та гол уриб, 68 та голли узатма амалга оширган. Месси Аргентина билан жаҳон чемпионати, икки марта Америка Кубоги, Финалиссима ва 2008-йилги Пекин Олимпиадасида олтин медални қўлга киритган.

Шу тариқа, Месси Аргентина терма жамоаси сафидаги фаолиятини ўйинлар, голлар ва голли узатмалар бўйича рекордчи сифатида якунлади.

• Футбол