39 ёшли Лионел Месси Аргентина миллий терма жамоасидаги фаолияти давомида уни қўллаб-қувватлаган барча инсонларга миннатдорлик билдирди. Футболчи бу ҳақда ижтимоий тармоқдаги саҳифасида эълон қилган хайрлашув мактубида маълум қилди.

7 октябрь куни Аргентина ўртоқлик учрашувида Бенинни 3:0 ҳисобида мағлуб этди. Мазкур баҳс Месси учун миллий терма жамоадаги сўнгги ўйин бўлди. Учрашувда ҳужумчи битта гол уриб, иккита голли узатмани амалга оширди.

«Кеча менинг сўнгги ўйиним бўлди ва мен аллақачон шу рангдаги либосни кийишни соғиниб улгурдим. Мен тўғри қарор қабул қилаётганимни биламан. Бу қувонч ва қайғуларга бой ажойиб саёҳат бўлди. Ҳар бир қадам бунга арзирли бўлганини англадим. Айтмоқчи бўлган гапларим ҳали жуда кўп. Ҳис қилаётган барча туйғуларимни бир неча сўз ёки битта хабар билан ифодалай олмайман», деб ёзди Месси.

Футболчи ушбу фаолиятида оиласи, дўстлари, жамоадошлари ва мураббийларининг ҳиссаси катта бўлганини таъкидлади. Шунингдек, у Аргентина футболи афсонаси Диего Марадона хотирасини ҳам йодга олди.

Месси 2023 йилдан буён МЛС вакили «Интер Маями» сафида тўп тепмоқда. У Аргентина терма жамоаси билан 2022 йилги Жаҳон чемпионати, 2021 ва 2024 йиллардаги Америка Кубоги ҳамда 2008 йилги Олимпиадада ғолиб чиққан.

Маълумотларга кўра, Месси Аргентина терма жамоаси сафида 208 та учрашувда майдонга тушиб, 126 та гол урган. У миллий жамоа тарихида ўтказилган ўйинлар ва урилган голлар бўйича рекордчи ҳисобланади.