Фарғона вилоятининг Бувайда туманида ҳоким ўринбосари экология инспекторига куч ишлатди. Маълумотларга кўра, Экология қўмитаси инспектори Аҳроржон Ниёзов аҳоли мурожаати асосида ҳолат жойига бориб, ноқонуний дарахт кесилишини аниқлаган ва ҳолатни расмийлаштирмоқчи бўлган.

Аммо унинг қонуний фаолиятига туман ҳокими ўринбосари Сайиджон Хидиров томонидан зўравонлик йўли билан қаршилик қилинган. Гувоҳларнинг айтишича, вазифасини бажараётган инспектор аввал асоссиз калтакланган, кейин эса миллий гвардия ва ИИБ ходимлари ёрдамида куч билан ҳудуддан олиб чиқилиб, туман ички ишлар бўлимига олиб кетилган.

Фарғона вилояти Экология бошқармаси ҳолат юзасидан расмий муносабат билдирган.

“Ижтимоий тармоқларда Бувайда тумани Найман қишлоғида зовур атрофидаги дарахтлар ноқонуний равишда кесилаётгани ҳақидаги хабарлар юзасидан Фарғона вилояти прокуратураси, вилоят Экология, атроф-муҳитни муҳофаза қилиш ва иқлим ўзгариши бошқармаси Бувайда туман бўлими давлат инспекторлари ҳамда ИИБ 2-минтақавий ҳудуд патруль-пост хизмати ходимлари томонидан шу куннинг ўзида назорат рейд тадбирлари ўтказилди”, – дейилади муносабатда.

Рейд давомида туманнинг Найман МФЙ ҳудудидаги зовур атрофида ноқонуний дарахт кесиш ҳолати тасдиқланган. 26 тўп кам қимматли дарахтнинг қонунга хилоф равишда кесилгани аниқланган. Унга Маъмурий жавобгарлик тўғрисидаги кодекснинг 79-моддаси 1-қисми бўйича баённома тузилиб, 10,3 миллион сўм жарима ҳамда 45,8 миллион сўмлик атроф-муҳитга етказилган зарар ҳисоблаб чиқилган.

Бошқарма мазкур ҳаракатни қаттиқ қоралаб, мансабдор шахслар қонуний жавобгарликка тортилиши учун чоралар кўрилишини маълум қилган. Бироқ маҳаллий бошқарма ҳодиса вақтида инспекторга босим бўлгани ҳақида аниқ маълумот бермаган.

Шунингдек, Бувайда тумани ҳокимлиги ҳолат юзасидан Бувайда тумани ҳокимлиги томонидан хизмат текшируви тайинланиб, ҳоким ўринбосари С. Хидировнинг ҳаракатларига доир дастлабки суриштирув ишлари олиб борилаётганини маълум қилди.

Фарғона вилояти ИИБ расмий муносабатида Бувайда тумани Экология қўмитаси инспекторини ИИБга олиб келинганлиги бўйича ахборот ҳақиқатга тўғри келмаслигини билдирди. Ҳозирда Бувайда тумани ҳокимлиги вакилларининг хатти-ҳаракатларига ҳуқуқий баҳо бериш бўйича ўрганиш ишлари олиб борилмоқда.

• Баёнот
• Экология
• Фарғона
• Ҳокимлик
• Qoidabuzarlik