Венесуэла Президенти Николас Мадуро ва унинг рафиқаси қўлга олиниб, мамлакатдан олиб чиқиб кетилди. Бу ҳақда АҚШ Президенти Доналд Трамп ўзининг ижтимоий тармоқлардаги саҳифасида ёзди.

“Президент Николас Мадуро ва унинг рафиқаси қўлга олиниб, мамлакатдан олиб кетилган. Ушбу операция АҚШ ҳуқуқни муҳофаза қилиш органлари билан ҳамкорликда ўтказилди. Тафсилотлар кейинроқ эълон қилинади”, дейди Трамп Truth Social тармоғида. 

Мадуро АҚШ армиясининг “Дельта” махсус бўлинмаси жангчилари томонидан қўлга олинган. Бу ҳақда ўз манбаларига таяниб, CBS телеканали журналисти Женнифер Жейкобс маълум қилди. 

“Манбаларимнинг хабар беришича, Венесуэла Президенти Николас Мадуро АҚШ Қуролли кучларининг махсус элита бўлинмаси – Delta Force томонидан қўлга олинган”, – дейди журналист.

Маълумот учун, “Дельта” – АҚШ Мудофаа вазирлиги томонидан ташкил этилган 1-махсус оператив отряд бўлиб, у 1970 йилларнинг охирида тузилган. Ушбу бўлинма АҚШнинг деярли барча йирик ҳарбий амалиётларида иштирок этган.

1989 йилда “Дельта” Панамада ўтказилган операцияда қатнашган. Ўшанда АҚШ наркотрафикка қарши кураш баҳонасида Панама Президенти Мануэл Норегани ҳокимиятдан ағдарган.

• Президент
• Венесуэла