Италия бош вазири Жоржа Мелонининг хизмат вазифасини ўташ чоғида олган совғаларини сотиш режаси танланган аукцион уйининг жиноий терговга жалб қилингани сабабли кимошди савдоси бошланмасданоқ бекор бўлди. Совғалар орасида қатор давлатлар раҳбарлари, жумладан, Ўзбекистон президенти берган қимматбаҳо тошли маржон ҳам бор.

Савдони ўтказиш учун танланган “Bertolami Fine Art” аукцион уйи археологик топилмаларнинг ноқонуний савдосига оид узоқ муддатдан бери давом этаётган суриштирув доирасида тергов қилинмоқда. Италия матбуотига кўра, мазкур иш юзасидан компаниянинг асосчиси ва эгасига нисбатан фаолиятни вақтинча чеклаш чораси қўлланган.

Италия қонунчилигига биноан, бош вазир хорижий давлат раҳбарларидан қабул қилган ва қиймати 300 евродан ошадиган совғаларни шахсий мулки сифатида олиб қолиши мумкин эмас. Шу боис бундай буюмларнинг аксарияти Киджи саройидаги махсус қўриқланадиган хонада сақланади ва кенг жамоатчиликка намойиш этилмайди.

“Мелонига берилган совғалар орасида унинг 2025 йил май ойида Ўзбекистонга расмий ташрифи вақтида Президент Шавкат Мирзиёев ҳадъя қилган олмос, олтин ва ситрин кварц тошли маржон ҳам мавжуд”, – дея ёзмоқда Politico.

Бундан ташқари, совғалар орасидан Словакия президенти Петер Пеллегринидан олинган бир қути заргарлик буюмлари ҳамда Венгрия бош вазири Виктор Орбан берган чинни идишлардан иборат сервиз ва олти шиша вино, АҚШнинг собиқ президенти Жо Байдендан сопол идиш, Украина президенти Володимир Зеленскийдан планшет, шунингдек, Ливия ва бошқа араб давлатларига сафарлар чоғида олинган 15 та гилам бор.

Таъкидланишича, бекор қилинган ушбу аукциондан қарийб 800 минг евро маблағ йиғилиши, тушган пулнинг асосий қисми эса хайрия ташкилотларига йўналтирилиши кутилганди. Маблағнинг кичикроқ қисми аукцион уйининг хизмат ҳақини қоплаш учун мўлжалланганди.

• Бош вазир
• Италия
• Шавкат Мирзиёев