2025 йилда дунёнинг турли ҳудудларида 128 нафар журналист ва ОАВ ходимлари ҳалок бўлди, улар орасида 10 нафар аёл ҳам бор. Бу ҳақда Халқаро журналистлар федерацияси (ХЖФ) хабар берди.

Маълум қилинишича, ушбу статистикага бахтсиз ҳодиса натижасида юз берган тўққизта ўлим ҳам киритилган. “2024 йилга нисбатан ўсиш журналистлар учун хавотир энг юқори даражада эканини англатади”, – дейди Халқаро журналистлар федерацияси раҳбари Энтони Белланжер.

Ташкилот ҳокимиятларнинг “ОАВ ходимларини ҳимоя қилишдаги ожизлиги”ни қоралади ва 2026 йилда “зўравонлик ва жазосизлик айланмасига барҳам бериш учун зудлик билан қатъий чоралар кўриш”га чақирди.

IFJ маълумотларига кўра, 2025 йилда журналистлар ва ОАВнинг бошқа ходимларини ўлдириш ҳолатлари билан жиддий вазият Яқин Шарқ ва араб мамлакатларида кузатилган: барча ҳолатларнинг 58 фоизи шу минтақада қайд этилган. Журналистлар энг катта хавфга қуролли можаролар кетаётган ҳудудларда дуч келади. Хусусан, 2025 йилда Яманда — 13 журналист, Украинада — 8, Суданда эса 6 журналист ҳалок бўлган.

Халқаро журналистлар федерацияси 1990 йилдан бери ОАВ ходимлари ўлими бўйича статистикани юритиб келади ва шу вақтдан буён жами 3173 та журналист ҳалок бўлган. 2025 йил 31 декабрь ҳолатига кўра, дунё бўйлаб 533 журналист қамоқда қолмоқда, уларнинг катта қисми (143 нафар) Хитойда. Бир йил аввал бу кўрсаткич 516 журналистни ташкил этган.

• Dunyo bo‘ylab
• O'lim
• jurnalist
• статистика