OpenAI компанияси ChatGPT чатботининг бепул версияси ва Go моделига реклама киритилишини эълон қилди. Бу ҳақда OpenAI расмий веб-сайтида маълум қилинди.

Баёнотда реклама интеграцияларини синаш яқин кунларда бошланиши айтилган. Таъкидланишича, реклама чатбот жавобларига таъсир кўрсатмайди ва ҳар доим аниқ белгиланади.

“Яқин кунларда биз АҚШда бепул тарифлар, ChatGPT ва Go учун рекламаларни синовдан ўтказишни бошлашни режалаштирмоқдамиз. Бу кўпроқ одамларга бизнинг воситаларимиздан камроқ чекловлар билан ёки бутунлай бепул фойдаланиш имконини беради. Plus, Pro, Business ва Enterprise обуналарига реклама киритилмайди”, – дея таъкидланади компания хабарида.

​Шунингдек, OpenAI фойдаланувчиларнинг ChatGPT билан ёзишмаларини ва уларнинг маълумотларини реклама берувчиларга сотмасликка ваъда берган. Бундан ташқари, фойдаланувчилар исталган пайтда шахсийлаштиришни ўчириб қўйишлари ва реклама учун фойдаланиладиган маълумотларни тозалашлари мумкин.

“Одамлар ChatGPT’га кўплаб муҳим ва шахсий вазифаларни ҳал қилишни ишониб топширади. Шу сабабли улар реклама киритишда “ChatGPT’ни қадрли қиладиган хусусиятларни сақлаб қолиш”ни жуда муҳим деб ҳисоблашади”, – дейди ишлаб чиқувчилар.

• ChatGPT
• реклама