Давлат хавфсизлик хизмати матбуот хизматининг маълум қилишича, ҳудудларда мансаб мавқеидан ғаразли мақсадларда фойдаланган ҳуқуқ-тартибот идоралари ходимлари қўлга олинган.

Хабарга кўра, Бухоро вилояти ИИБ ходими жиноят ишини тугатишда мансабдор шахслар орасидаги танишлари орқали гумонланувчидан ёрдам бериш учун 13 минг доллар талаб қилган. У сўралган пулни олаётган вақтида қўлга олинган.

Яна бир ҳолатда, Тошкент вилояти ИИБ қўриқлаш бошқармаси Ангрен шаҳар бўлими оддий ходими бошқарма командири ўринбосари билан тил бириктириб, Оққўрғон туманида яшовчи фуқародан қўриқлаш бўлимига ишга жойлашишда ёрдам бериш учун 1,5 минг АҚШ доллари талаб қилган.

“Мазкур шахс аванс сифатида 1000 АҚШ долларини олаётган вақтда жиноят устида ушланган”, – дейилади хабарда.

ИИВ Миграция ва персоналлаштириш бошқармаси “Тошкент” халқаро аэропорти паспорт-виза бўлими катта инспектори 400 АҚШ доллари миқдорида пора олаётган вақтида жиноят устида ушланган.

Дастлабки тергов давомида маълум бўлишича, жорий йил бошидан буён катта инспектор Ўзбекистонда бўлган 42 нафар чет эл фуқаросидан чиқиш визаси расмийлаштиргани учун 300-700 АҚШ доллари, шунингдек, ҳамроҳ бўлган шахсга тезкор муҳр босилиши учун саккиз нафар Ўзбекистон фуқаросидан 200-400 АҚШ доллари олган.

Ҳолат юзасидан Жиноят кодексининг тегишли моддалари билан жиноят иши қўзғатилиб, барча гумонланувчилар қамоққа олинган.

Ҳозирда юқоридаги ҳолатлар юзасидан тергов ҳаракатлари олиб борилаётгани билдирилган.

• ДХХ
• Жиноят
• Коррупция
• Пора