АҚШ президенти Доналд Трамп Канада товарларига нисбатан божларни қўшимча 10 фоизга оширди. Бу ҳақда у ўзининг Truth Social саҳифасида маълум қилди.

Қўшимча 10 фоизлик бож “ҳозир тўлаётганларидан ташқари” қўлланади. Бу Канада билан савдо музокаралари тугаганидан атиги икки соат ўтгач, жорий этилмоқда.

Трамп бож ошишига Канаданинг Онтарио провинцияси ҳукумати томонидан эълон қилинган реклама сабаб бўлганини айтди. Мазкур рекламада республикачилар рамзи бўлган марҳум президент Роналд Рейган тасвирланган. Видеода у божлар савдо урушлари ва иқтисодий фалокатга олиб келиши ҳақида гапирган.

Рейган жамғармаси Канада “президентнинг аудио ва видеоларини танлаб ишлатгани”ни маълум қилди. Жамғарма маълумотига кўра, реклама Рейганнинг радио орқали қилган чиқишини бузиб кўрсатган ва Канада тараф бу материаллардан фойдаланиш ҳамда уларни таҳрирлаш учун рухсат олмаган.

“Роналд Рейган миллий хавфсизлик ва иқтисодиёт мақсадлари учун бож тарифларини жуда ёқтирарди, лекин Канада бунинг акси эканини айтди! Уларнинг рекламаси дарҳол олиб ташланиши керак эди, аммо улар буни фирибгарлик эканини била туриб, кеча кечқурун Жаҳон чемпионати пайтида намойиш этишди. Уларнинг фактларни жиддий равишда нотўғри талқин қилгани ва душманона хатти-ҳаракатлари туфайли, мен Канадага нисбатан божхона тарифини улар ҳозир тўлаётганидан 10 фоизга оширяпман”, – деди Трамп.

• АҚШ
• Канада
• Трамп