Давлат хавфсизлик хизмати ваколатларига киритилган масалалар юзасидан жисмоний ва юридик шахсларнинг мурожаатларини тезкор равишда қабул қилиш мақсадида cалл-марказ фаолият юрита бошлади.

Қайд этилишича, бу “Давлат хавфсизлик хизмати тўғрисида”ги қонунга мувофиқ ДХХ ваколатларига киритилган масалалар юзасидан жисмоний ва юридик шахсларнинг мурожаатларини тезкор равишда қабул қилиш мақсадида ишга туширилган. Унга 1520 қисқа рақами орқали қўнғироқ қилиш мумкин.

Хусусан, қуйидаги масалалар юзасидан мурожаатлар қабул қилинади:

– Ўзбекистон Республикасининг конституциявий тузуми, суверенитети ва ҳудудий яхлитлигига бўлган тажовузлар ҳақида;

– давлат чегараси қўриқланиши ва ҳимоя қилинишига бўладиган таҳдидлар;

– Қуролли кучлар ва мудофаа-саноат мажмуасида давлат хавфсизлигига бўладиган таҳдидлар;

– терроризм, экстремизм, уюшган жиноий гуруҳларга оид;

– қурол-яроғ, гиёҳвандлик воситалари ва психотроп моддаларнинг ноқонуний айланмасига доир жиноятлар ҳақида;

– давлат манфаатларига таҳдид солувчи коррупция ва иқтисодий жиноятлар юзасидан;

– миллий, этник ва диний адоватни тарғиб этиш;

– давлат манфаатлари ва хавфсизлигига таҳдид солувчи ҳуқуқбузарликларнинг содир этилишига доир бошқа ахборотлар.

Шу билан бирга, Жиноят-процессуал кодексининг 345-моддасида (жиноят ишининг терговга тегишлилиги) белгилаб қўйилган ва тергови ДХХ ваколатига киритилган Жиноят кодексининг 150-163-тинчлик ва инсоният хавфсизлигига қарши жиноятлар, Ўзбекистон Республикасига қарши жиноятлар, 182-божхона тўғрисидаги қонунчиликни бузиш, 223-қонунга хилоф равишда чет элга чиқиш ёки Ўзбекистонга кириш, 246-моддаларида (контрабанда) назарда тутилган жиноятларга доир масалалар юзасидан мурожаатлар қабул қилинади.

Таъкидланишича, “Жисмоний ва юридик шахсларнинг мурожаатлари тўғрисида”ги қонуннинг 38-моддасига асосан мазкур қонунни бузганлик, худди шунингдек, туҳмат ва ҳақоратдан иборат мурожаат берганлик белгиланган тартибда жавобгарликка сабаб бўлади.

“Мурожаат қилган фуқароларнинг шахси сир сақланиши кафолатланади”, — дейилади хабарда.

• ДХХ
• Янгилик