Хитой Марказий Осиё давлатларига мудофаа қобилиятини мустаҳкамлашда ёрдам беришга тайёр. Бу ҳақда Хитой етакчиси Си Цзиньпин Сиан шаҳрида бўлиб ўтаётган “Хитой – Марказий Осиё” саммитида маълум қилди.

“Хитой Марказий Осиё давлатларига ҳуқуқ-тартибот ва мудофаа салоҳиятини мустаҳкамлашга ёрдам беришга, шунингдек, минтақавий хавфсизликни сақлаш ва терроризмга қарши курашиш борасидаги саъй-ҳаракатларини қўллаб-қувватлашга тайёр”, – дейди Си Цзиньпин.

Шунингдек, у Хитой Афғонистонни тинч йўл билан тиклашга кўмаклашишда давом этишини таъкидлаб, дунё барқарор Марказий Осиёга муҳтожлигини айтиб ўтди.

“Марказий Осиёнинг суверенитети, хавфсизлиги, мустақиллиги ва ҳудудий яхлитлиги сақланиши, Марказий Осиё халқи танлаган тараққиёт йўли ҳурмат қилиниши керак”, – дея қўшимча қилди у.

Эслатиб ўтиш мумкин, 18 май куни Ўзбекистон Республикаси Президенти Шавкат Мирзиёевнинг Хитойга давлат ташрифи доирасида Хитой Халқ Республикаси Раиси Си Цзиньпин билан икки томонлама музокаралар натижасида 41 та ҳужжат имзоланди. Давлат раҳбарлари Қўшма баёнотида 2023-2027 йилларга мўлжалланган Ўзбекистон билан Хитой ўртасида янги даврдаги ҳар томонлама стратегик шерикликни ривожлантириш дастури ҳам қабул қилинди.

• Марказий_Осиё
• Хитой
• саммит