Ўзбекистонда ярим йил ичида минглаб хонадонлар давлатга қиймати 64 миллиард сўмга яқин Қуёш энергияси етказиб берди.

Энергетика вазирлиги маълумотига кўра, жорий йилнинг январь–июнь ойларида 28 538 нафар жисмоний шахс ўзининг Қуёш панеллари орқали давлат электр тармоқларига жами 63 миллиард 498 миллион сўмлик энергия узатган. Бу маблағ “Қуёшли хонадон” дастури доирасида давлат бюджетидан ажратилган субсидия ҳисобланади.

Ҳудудлар кесимида энг кўп субсидияни Хоразм вилояти аҳолиси олган — 19,1 миллиард сўм. Ундан кейин 9,7 миллиард сўм билан Қорақалпоғистон Республикаси ва 4,9 миллиард сўм билан Тошкент шаҳри кузатилган. Қолган ҳудудларда бу кўрсаткич нисбатан кам.

Субсидия олиш жараёни қулайлаштирилган. Фуқаролар “Солиқ” мобил иловасидаги “Кешбек ва имтиёзлар” хизматидаги “Қуёшли хонадон” бўлими орқали “Картага пул ўтказиш” танланмаси ёрдамида маблағни ўз банк картасига ўтказиб олиши мумкин.

Маълумот учун, 2023 йил 1 апрелдан бошлаб, хонадонга ўрнатилган Қуёш панеллари орқали давлат тармоғига узатилган ҳар бир кW/ҳ энергия учун 1 000 сўмдан субсидия тўланиши белгиланган. Ушбу дастур аҳолини “яшил” энергиядан кенг фойдаланишга рағбатлантириш ҳамда қайта тикланувчи манбалар ҳиссасини оширишга қаратилган.

• Электр энергияси
• Энергетика_вазирлиги
• статистика