“Ҳудудий электр тармоқлари” қарздорлиги бўлганлар 7 кун давомида электр энергияси учун тўловни тўлай олмаслиги ҳақида ижтимоий тармоқларда тарқалган хабарларни рад этди.

Унда 30 октябрдан 5 ноябргача RES ҳисоб-китоб тизими янги ҳисобга олиш тизимига ўтиш муносабати билан техник хизмат кўрсатишдан ўтказилиши, бу вақт ичида электр энергияси учун ҳақ тўлаш ёки қувватни қайта улаш имконсиз бўлиши ва тизим 6 ноябргача ишламай қолиши айтилган. Агар истеъмолчининг тўланмаган қарзлари бўлса, электр таъминоти тўхтатилиши ҳамда иш тугагунига қадар тикланмаслиги таъкидланган эди.

“Ҳудудий электр тармоқлари” бу хабарлар мутлақо асоссиз ва ҳақиқатга тўғри келмаслигини маълум қилди.

“Айни пайтда жамият ҳеч қандай янги ҳисобга олиш тизимига ўтиш ишларини амалга оширмаяпти”, –дейилади хабарда.

Шунингдек, “Ҳудудий электр тармоқлари” фуқаролардан фақат расмий манбаларда эълон қилинадиган ахборотларга ишониш ва тасдиқланмаган хабарларни тарқатмасликни сўраган.

• Баёнот
• Электр энергияси
• «Ҳудудий электр тармоқлари»