“Реал Мадрид” Европа футбол уюшмаси (УЕФА)дан 4 миллиард евродан ортиқ миқдорда товон пули талаб қилмоқчи. Клуб Европа Суперлигаси лойиҳаси бекор қилингани сабаб катта молиявий зарар кўрганини билдирмоқда.

Financial Times нашрига кўра, “Реал Мадрид” мутахассислари тайёрлаган ҳужжатларда клуб 2021 йилдан бери УЕФА қарори туфайли 4,5–4,7 миллиард еврога тенг даромаддан маҳрум бўлгани қайд этилган. Бу ҳисоб-китобларга стадиондан тушадиган пуллар, телетранслация ва реклама даромадлари киритилган.

Клубга яқин манбаларнинг айтишича, “Реал Мадрид” тез орада судга 4 миллиард евродан ортиқ миқдорда расмий даъво киритади.

Бу воқеа Мадрид вилояти судининг УЕФА, Ла Лига ва Испания футбол федерацияси (RFEF) шикоятини рад этганидан сўнг юз берди. Суд УЕФА тўрт йил аввал Суперлига лойиҳасини тўхтатиб, ўз мавқеини суиистеъмол қилган деган қарорга келди.

Суперлига дастлаб 20 та клубдан ташкил топиши режалаштирилган, улардан 15 таси, жумладан “Реал Мадрид”, доимий аъзо сифатида қатнашиши керак эди. Бироқ лойиҳа жамоатчилик ва сиёсатчиларнинг кескин норозилигидан сўнг эълон қилинганидан 72 соат ўтмай тўхтатилди.

Кейинчалик лойиҳани юритган А22 Sports Management компанияси уни “Унифй League” деб қайта номлаб, очиқ рақобат тарафдори эканини билдирган.

“Реал Мадрид” суд қарорини клуб фойдасига деб баҳолади ва УЕФА Европа қонунларини жиддий равишда бузганини таъкидлади. Клуб бу ҳолат товон пули ундириш учун ҳуқуқий асос бўлишини маълум қилди. 2023 йил декабрь ойида Европа Иттифоқи суди ҳам УЕФА клублар ва футболчиларга Суперлигага қўшилган тақдирда санкция қўллаш билан таҳдид қилгани ноқонуний эканини эътироф этган эди.

• Real
• Суд
• УЕФА