Ўзбекистон футзал терма жамоаси 2026-йилги футзал бўйича Осиё Кубоги чорак финалида Эрон терма жамоасига қарши майдонга тушди. “Жакарта халқаро велодроми” мажмуасида бўлиб ўтган учрашувда Нодир Элибоев бошқарувидаги жамоа 4:7 ҳисобида мағлубиятга учради.

Учрашувдаги ҳисобни Ўзбекистон терма жамоаси очди. 1-дақиқада Ихтиёр Ропиев белгиланган пенальтини аниқ ижро этиб, жамоани олдинга олиб чиқди. 5-дақиқада Элбек Тўлқинов Ропиевнинг узатмасидан сўнг фарқни иккитага оширди. Шундан сўнг Эрон футзалчилари устунликни қўлга олди. 6-дақиқада Муслим Оладгобад, 9-дақиқада Саид Аҳмадаббоси, 12-дақиқада Муҳаммадҳусайн Дераҳшони, 18-дақиқада Ҳусайн Сабзий гол киритиб, ҳисобни 4:2 га етказди.

Иккинчи бўлим ҳам кескин курашларга бой бўлди. 25-дақиқада Ҳусайн Тоиби пенальтидан гол киритди. 26-дақиқада Суннатилла Жўраев ҳисобни қисқартирди. 31-дақиқада дарвозабон Аббос Элмуродов узоқ масофадан берилган зарбани қайтарди, бироқ тўпга жарима майдончасидан ташқарида қўл билан теккани учун унга қизил карточка кўрсатилди. Эронликлар белгиланган жарима зарбасидан унумли фойдаланиб, ҳисобни 6:3 га оширди. 33-дақиқада Музаффар Аҳаджонов Ўзбекистон терма жамоасининг 4-голини киритди. 39-дақиқада Сабзий дубль қайд этиб, учрашувга мантиқий якун ясади. Якуний ҳисоб 7:4 Эрон фойдасига.

Шу тариқа, Эрон ярим финалга йўл олган бўлса, Ўзбекистон терма жамоаси эса мусобақа билан хайрлашди.

• Eron
• Футзал
• Осиё кубоги
• Ўзбекистон