Reuters’нинг хабар беришича, судга даъво аризаси Гарвард ўқитувчилари ва АҚШ университет профессорлари ассоциацияси (ААУП) томонидан берилган. Даъво аризасига кўра, Трамп маъмурияти сиёсий қарашларини олийгоҳга мажбуран қабул қилдиришга уринмоқда ва “молиялаштиришдан маҳрум этиш” таҳдидини босим воситаси сифатида қўлламоқда.

“Гарвардга давлат грантлари ва шартномалар кўринишида тақдим этилган тахминан 9 млрд доллар маблағ қандай сарфланаётганини ўрганиш учун бир вақтда учта идора — Таълим вазирлиги, Соғлиқни сақлаш вазирлиги ва АҚШ Бош хизматлар бошқармаси текширув бошлаган”, – деб ёзмоқда агентлик.

31 март куни Вашингтондан Гарвард юборилган расмий хатда давлат қўллаб-қувватловини сақлаб қолиш учун амалга оширилиши шарт бўлган бир қатор талаблар кўрсатилган. Улар орасида — намойишларда ниқоб тақишни тақиқлаш, инклюзив дастурларини қисқартириш ва ҳуқуқни муҳофаза қилувчи органлар билан ҳамкорлик қилиш талаблари бор. Бироқ Гарвард ўқитувчилари буни университет сиёсатини бузиш ва сўз эркинлигига тўғридан-тўғри аралашиш дея баҳоламоқда.

Шунингдек, АҚШ Таълим вазирлиги қошидаги антисемитизмга қарши бўлими Гарвард университетига ажратилган 2,2 млрд долларлик грантларни музлатди. Бу қарор яҳудий талабаларни ҳимоя қилиш талаблари ва аксилисроил намойишлар фонида қабул қилинган.

• АҚШ
• Суд
• Трамп
• Университет