АҚШ ва Исроил кўмагида ташкил этилган “Ғазо гуманитар ёрдами фонди” орқали фаолият юритаётган гуманитар ёрдам марказларида тарқатилаётган ун халталарида наркотик таъсирга эга дори воситалари аниқланган. Бу ҳақда Quds news network хабар берди.

Маълум бўлишича, тўрт киши АҚШ-Исроил гуманитар ёрдам марказларидан олинган ун халталари ичида оксикодон туридаги наркотик модда сақловчи таблеткаларни топган.

“Бундай моддаларнинг ун халталарига жойлаштирилиши фуқаролар саломатлиги ва жамият тузилмасига қарши йўналтирилган жирканч жиноят ҳисобланади”, – дейилади хабарда.

Шундан сўнг, Ғазо ҳукумати Исроилни гуманитар ёрдам ниқоби остида фаластинликлар орасида гиёҳвандликни ёйишга уринишда айбламоқда. Уларнинг сўзларига кўра, бундай моддаларни “ифлос урушнинг юмшоқ воситаси” сифатида ишлатиш ҳарбий жиноят бўлиб, халқаро гуманитар ҳуқуқ меъёрларига зид.

Ҳукумат аҳолига мурожаат қилиб, бундай марказлардан олинган ёрдам маҳсулотларини синчиклаб текширишга, шунингдек, ҳар қандай шубҳали моддалар топилганда зудлик билан хабар беришга чақирган.

Баёнотда халқаро ҳамжамиятга мурожаат қилиниб, “ўлим тузоғи”га айланган ва юзлаб инсонларнинг ўлимига сабаб бўлган бу каби марказларнинг фаолиятини тўхтатиш сўралган.

• Фаластин
• Гиёҳвандлик
• Гуманитар ёрдам
• Isroil