Маълумотларга кўра, 7 октябрдан бери Ғазода ўлдирилган журналистлар сони ортган. Исроил армиясининг Ғазо секторида Шифа касалхонасида уюштирган ҳужумида яна бир журналист ҳалок бўлгани айтилмоқда.

Ҳукуматнинг Ғазодаги матбуот хизматидан берилган баёнотда, Исроил Ғазога ҳужумларини бошлаган 7 октябрдан бери ҳалок бўлган журналистлар сонининг 138 нафарга етгани билдирилди.

Хабарга кўра, Муҳаммад Абу Саҳил исмли фаластинлик журналист Исроилнинг Шифа касалхонасига уюштирган рейд пайтида вафот этган.

Кеча, 1 апрель куни Исроил армияси Ғазо секторидаги энг йирик тиббиёт мажмуаси бўлган Шифа касалхонаси ва унинг атрофидан ўз қўшинларини олиб чиқиб кетганини эълон қилди.

14 кун давом этган ҳужумлар давомида Исроил армияси Шифа касалхонасида 200 дан ортиқ одамни ўлдирган ва 900 дан ортиқ фаластинликни ҳибсга олган.

Гувоҳларнинг хабар беришича, Исроил аскарлари касалхонани тарк этишдан олдин барча биноларни ёқиб юборишган ва уни бутунлай йўқ қилишган. Улар шифохонанинг жарроҳлик биносининг пол ва палаталарини бутунлай бузиб ташлашган, асосий қабулхона ва тез тиббий ёрдам бўлимини ёқиб юборишган ҳамда барча тиббий жиҳозларни йўқ қилишган.

7 октябрдан бери Исроилнинг Ғазо секторига ҳужумлари натижасида 32 845 фаластинлик, жумладан 14 280 нафар бола ва 9 340 нафар аёл ҳалок бўлган, 75 392 нафари яраланган.

• Фаластин
• Isroil
• jurnalist