Ўзбекистон Республикаси Президенти “Ҳудудларда ёшларга рақамли технологиялар ва хорижий тилларни ўрганиш учун қўшимча шароитлар яратишга қаратилган “ IТ – шаҳарча”лар фаолиятини ташкил этиш тўғрисида” қарор қабул қилди.

Унга мувофиқ, Самарқанд вилояти Нуробод туманида амалга оширилган тажриба асосида фаолияти ҳудудларда ёшларни рақамли технологиялар ва хорижий тилларга ўқитишга йўналтирилган “IТ-шаҳарча”лар ташкил этилади.

“IТ-шаҳарча”ларнинг асосий фаолияти қуйидагилардан иборат бўлади:

ёшларни рақамли технологиялар соҳасига йўналтириш, уларнинг мазкур соҳада билим эгаллаш бўйича интилишларини рағбатлантириш;

семинарлар, менторлик дастурлари ва онлайн таълим ресурслари орқали ёшларда уларнинг меҳнат бозорида муваффақиятга эришишига ёрдам берувчи рақамли технологиялар соҳасидаги кўникмаларни шакллантириш ва ривожлантириш;

дастурлаш ва рақамли технологиялардан фойдаланган ҳолда хизматлар кўрсатиш йўналишларида таълим бериш, хорижий тиллар, шу жумладан инглиз тилига ўқитиш орқали ёшларнинг билим ва салоҳиятини ошириш;

ёш авлодни замонавий касбларга ўқитиш, шунингдек, табиий ресурслардан оқилона фойдаланиш кўникмаларини ошириш.

Қарор билан:

“IТ-шаҳарча”лар фаолиятини ташкил этиш учун ажратиладиган ер участкалари ҳамда бино ва иншоотлар рўйхати;

“IТ-шаҳарча"лар фаолиятини самарали ташкил этиш бўйича чора-тадбирлар дастури тасдиқланди.
Ҳудудларда ташкил этиладиган “IТ-шаҳарча”лар Рақамли технологиялар вазирлиги ҳузуридаги "Рақамли таълимни ривожлантириш маркази" давлат муассасасининг юридик шахс мақомига эга бўлмаган бўлинмалари ҳисобланади.

Марказ “IТ-шаҳарча"лар фаолиятини самарали ташкил этиш ва ривожлантириш бўйича қуйидагиларни амалга оширади:

ёшларга бепул таълим олиш учун қулай шароитлар яратади, таълим жараёнлари сифатли ташкил этилиши ва амалга оширилишини таъминлайди ҳамда ёшларга халқаро масофавий таълим платформаларида билим олиш имкониятини яратади;

таълим бериш учун менторларни жалб қилади, улар билан шартномалар тузади, шунингдек, билим ва кўникмаларини доимий ошириб боради;

“IТ-шаҳарча"лар фаолиятини мувофиқлаштиради ҳамда юклатилган вазифалар ижроси назоратини амалга оширади;

ўқув дастурларига биноан ёшларнинг билим олиши ва кўникмалар эгаллаши, шунингдек, машғулотлар бўйича давоматини мониторинг қилиб боради;
Ёшлар ишлари агентлиги билан биргаликда “IТ-шаҳарча”ларда ёшлар иштирокида соҳага оид турли мусобақалар, танлов ва бошқа тадбирларни ташкил қилади.

Қарор билан ҳудудларда “IТ-шаҳарча”лар фаолиятини самарали ташкил этиш бўйича ишчи гуруҳ таркиби ҳам тасдиқланди. Ишчи гуруҳининг асосий вазифалари:

намунавий лойиҳалар асосида “IТ-шаҳарча”ларни барпо этиш, уларни мебел, компютер техникаси ҳамда бошқа воситалар, зарурий муҳандислик инфратузилмалари билан таъминлаш ишларини ташкил этиш;

таълим жараёнига рақамли технологиялар, хорижий тиллар ва замонавий касблар йўналишида юқори билим ва кўникмаларга эга бўлган мутахассислар (менторлар)ни жалб қилишга кўмаклашиш;

“IТ-шаҳарча”лар фаолияти самарадорлигини баҳолаш ва мониторинг қилиш;

мутахассислар (менторлар) малакаси мунтазам ошириб борилиши, ёшларнинг “IТ-шаҳарча”ларда таҳсил олишга йўналтирилишини таъминлашдан иборат бўлади.

• Қарор
• Самарқанд