Илон Маск сунъий интеллект (AI) соҳасидаги 1000 дан ортиқ экспертлар билан биргаликда кучли нейрон тармоқларни ўқитишга мораторий жорий этишни талаб қилди, чунки бу соҳадаги назоратсиз жараён инсониятга хавф туғдириши мумкин. Бу ҳақда 22 март куни “Future of Life Institute” (“Future Life Institute”) нотижорат ташкилоти сайтида эълон қилинган сунъий интеллект бўйича мутахассисларнинг очиқ хатида айтилади.

“Биз барча сунъий интеллект лабораторияларини GPT-4 дан кучлироқ сунъий интеллект тизимлари бўйича машғулотларни дарҳол камида 6 ойга тўхтатишга чақирамиз. Ушбу танаффус оммавий равишда эълон қилиниши керак, унинг бажарилиши текширилиши ва барча асосий саноат иштирокчиларини ўз ичига олиши керак. Агар имкон қадар тезроқ бундай пауза қилишнинг иложи бўлмаса, ҳукуматлар аралашиб, мораторий жорий этиши лозим”, – дейилади мактубда.

Имзоловчилар сунъий интеллект лабораториялари ва мустақил экспертлар умумий хавфсизлик протоколларини биргаликда ишлаб чиқиш ҳамда амалга ошириш учун ушбу “нафас олиш майдони” дан фойдаланишлари керак, деб ҳисоблашади. Таъкидланишича, бу мустақил ташқи экспертлар томонидан синовдан ўтказилиши ва бошқарилиши мумкин бўлган илғор сунъий интеллект тизимларини лойиҳалаш ва ишлаб чиқиш учун зарур бўлади.

Бунга параллел равишда экспертлар янги AI регуляторларини, шунингдек, янги тизимлар хавфсизлигини таъминлайдиган ҳукумат даражасидаги назорат тизимларини яратиш учун сиёсий соҳани ўзгартиришни таклиф қилмоқдалар.

Очиқ хатни имзолаганлар орасида Маскдан ташқари “Apple” асосчиларидан бири Стив Возняк, сунъий интеллект соҳасидаги етакчи экспертлар Стивен Рассел ва Жошуа Бенжио каби таниқли мутахассислар, шунингдек, ахборот технологиялари ва машиналарни ўрганиш соҳасида фаолият юритувчи 1100 дан ортиқ етакчи мутахассислар бор.

Қайд этиш мумкин, жорий йил март ойи ўрталарида Американинг “OpenAI” компанияси табиий тилларни қайта ишлаш алгоритмининг янги авлоди – мултимодал GPT-4 моделини тақдим этди. Унинг муаллифларининг фикрича, аввалги GPT-3.5 версиясидан анча устун ҳисобланади.

Шундай қилиб, GPT-4 кўпроқ “ижодкорлик” билан таъминланган ва фойдаланишда ишончлироқ, у батафсилроқ сўровларни қайта ишлашга қодир. Ҳақиқийлик ёки ишончлиликнинг ички баҳоларига кўра, у GPT-3.5 дан 40 фоизга аниқроқ. Мисол тариқасида компания адвокат учун тест – симуляторни келтирди, унинг ёрдамида иккала нейрон тармоқ ҳам баҳоланади. GPT-4 кўрсаткичлари тахминан энг юқори 10 фоиз, GPT-3.5 эса пастки 10 фоиз бўлган.

• Apple
• Ilon_Mask
• Neyrobiolog
• sun’iy intellekt