Илон Маск анклавдаги хавф туфайли Ғазога ташриф буюришга ҳали тайёр эмаслигини айтди.
Фаластиннинг ХАМАС ҳаракати америкалик миллиардер ва SpaseX эгаси Илон Маскни Ғазо секторига ташриф буюришга таклиф қилди. Бу ҳақда Байрутдаги матбуот анжуманида ҳаракат раҳбарияти аъзоси Усама Ҳамдан маълум қилди, деб ёзади Ал-Жазира нашри.

“Биз Илон Маскни Ғазо секторига ташриф буюришга чақирамиз, токи у Исроилнинг Ғазо секторида халқимизга қарши амалга оширган қирғин кўламини кўриши мумкин”, – деган у.

Бундан ташқари, ХАМАС жаҳон оммавий ахборот воситалари журналистларини Исроил армияси томонидан содир этилган вайронагарчиликлар кўлами ва геноцид белгиларини кўриш учун Ғазо секторидаги иштирокини оширишга чақирган.

Илон Маск Исроилга 27 ноябрь куни ташриф буюрган эди. Ўша кунги суҳбатда тадбиркор Исроил бош вазири Бинямин Нетаняхуга Ғазо секторидаги қайта тикланишга тайёрлигини маълум қилган, дея хабар берди РИА Новости.

Маскнинг гапига изоҳ берар экан, Нетаняху тинчлик ўрнатиш ва Ғазо секторини тиклаш фақатгина ХАМАС мағлуб бўлгандан кейин мумкин бўлишини таъкидлаган. Тадбиркор сиёсатчининг фикрини маъқуллаган ва “қотилликларни режалаштираётган”ларни зарарсизлантириш зарурлигини айтган.

Бундан ташқари, Исроил бош вазири реставрация қилишда америкалик тадбиркорнинг ёрдамига умид қилишини алоҳида қайд этиб ўтган. Маск бундан хурсанд бўлишини айтган.
Аввалроқ бош вазир Илон Маскга ХАМАС аъзолари кириб келган чегарадаги Киббутз Кфар Аза аҳоли пунктига ташриф буюриб, у ерда жанубий аҳоли пунктларига қилинган ҳужум оқибатларини кўрсатганини маълум қилгандик.

• Фаластин
• Ilon_Mask
• Isroil