2023 йилда иқтисод бўйича Nobel мукофоти лауреати америкалик Клаудия Голдин деб топилди. У мукофотни “меҳнат бозорида аёлларнинг роли ҳақида олиб борган тадқиқотлари учун” қўлга киритди.

Клаудия Голдин тадқиқотида меҳнат бозоридаги гендер фарқларининг асосий омилларини очиб берган.

“Ўтган асрда кўплаб юқори даромадли мамлакатларда ҳақ тўланадиган ишда аёллар улуши уч баробарга ошди. Бу замонавий даврда меҳнат бозоридаги энг катта ижтимоий ва иқтисодий ўзгаришлардан биридир, аммо жиддий гендер фарқлари сақланиб қолмоқда. Биринчи марта 1980 йилларда тадқиқотчи ушбу фарқлар манбасини тушунтириш учун комплекс ёндашувни қўллади. Клаудия Голдиннинг тадқиқотлари бизга аёлларнинг меҳнат бозоридаги тарихий ва замонавий роллари ҳақида янги ва тез-тез ҳайратланарли тушунчаларни берди”, – деди Nobel қўмитаси аъзоси.

2022 йилда иқтисод бўйича Nobel мукофоти Бен Бернанке, Дуглас Диамонд ва Филипп Дюбвигга “молиявий инқирозлар ва банк иши бўйича тадқиқотлари учун” берилган эди.

Иқтисодиёт бўйича Алфред Нобель мукофоти Nobel ҳафталигига якун ясади. Тинчлик мукофотидан ташқари барча Nobel мукофотларини топшириш маросими 10 декабрь куни Стокгольмда бўлиб ўтади.

Тинчлик мукофоти ҳам ўша куни, фақат Ослода топширилади. Тинчлик бўйича 2023 йилги мукофот ғолиби ҳибсдаги эронлик ҳуқуқ ҳимоячиси Наргис Муҳаммадига берилган эди.

• Мукофот
• Нобел