“Нетсарим йўлагидаги назорат пунктлари 27 январь куни эрталаб очилди. Бир неча кун давом этган кутишдан сўнг, минглаб фаластинликлар анклав шимолига йўл олди”, – деб ёзмоқда Associated Press.

Исроил ва ХАМАС ўртасидаги келишувга кўра, Исроил кучлари Ғазо секторидаги чегара бўйлаб буфер ҳудудга чекиниши, шунингдек, Ғазо секторини иккига ажратиб турувчи Нетсарим йўлаги ва Миср билан чегара бўйлаб жойлашган Филаделфия йўлагининг катта қисмини тарк этиши керак эди. Бу жараён ХАМАС ва Исроил ўртасидаги гаровга олинганларни озод қилиш тартибига оид низолар сабаб икки кунга кечиккан.

Тел-Авив гаровга олинган тинч аҳоли вакили Арбел Еҳуднинг озод қилиниши талабини қўйган. Исроил ХАМАСни биринчи босқичда озод қилиниши керак бўлган гаровдагилар ҳақида маълумот бермаганликда айблаган. ХАМАС эса Исроилни назорат пунктларини очиш бўйича келишувни бузганликда айблаган.

Қатар воситачилигида ўтказилган музокаралар чоғида ХАМАС Арбел Еҳуд ва яна икки нафар гаровдаги исроилликни жума кунигача топширишга рози бўлган. Бинямин Нетаняҳунинг тасдиқлашича, улар 30 январь куни озод қилинади.

Исроил ХАМАСга қарши асосий ҳарбий операцияларини Ғазо секторининг шимолида олиб борган. Шу сабабли, ҳудудда уруш давомида катта миқдорда қурбонлар вайронагарчиликлар қайд этилган.

• Фаластин
• G‘azo
• Isroil