Исроил Ғазо секторида ўт очишни тўхтатиш бўйича ХАМАСга янги таклиф юборди. Таклиф мисрлик воситачилар орқали етказилган. Бу ҳақда Reuters хабар берди.

ХАМАСнинг юқори мартабали вакили таклифнинг камида иккитаси улар учун номақбул эканини аллақачон маълум қилган. Ҳозирда воситачилар ХАМАСдан расмий жавоб кутмоқда. Фаластин гуруҳи ўзининг асосий талабини яна бир бор таъкидлаган. Унга кўра, ўт очишни тўхтатиш бўйича ҳар қандай келишув Ғазодаги урушга чек қўйиши ва Исроил қўшинларининг сектордан тўлиқ чиқиб кетишини таъминлаши керак.

Бироқ янги таклиф Исроилнинг жанговар ҳаракатларни тўлиқ тўхтатишини ўз ичига олмайди. Бундан ташқари, Исроил биринчи марта музокараларнинг кейинги босқичида ХАМАСни қуролсизлантириш талабини киритган. Фаластин гуруҳи эса мазкур шартларга рози эмас.

Исроил ушбу таклифга расман изоҳ бермаган. Ҳозирча, ўт очишни тўхтатиш ва гаровга олинганларни озод қилиш бўйича музокаралар уруш фонида олиб борилмоқда.

• Фаластин
• Isroil
• Музокара
• Уруш