The Wall Street Journal мухбирлари икки нафар шимолий кореялик аскар – 21 ёшли Пек ва 26 ёшли Ри билан гаплашди. Иккиси ҳам украиналик ҳарбийлар томонидан асирга олинган.

Пекнинг айтишича, у 17 ёшидан бери КХДР армиясида тўпчи сифатида хизмат қилган – 2021 йилда ҳарбий хизматга чақирилган. Шундан бери оиласини кўрмаган, доимий равишда ҳарбий машғулотларда ёки мамлакатнинг турли ҳудудларида йирик қурилишларга ёрдам бериш учун хизмат сафарларида бўлган.

Ри эса КХДРда снайпер сифатида хизмат қилган. Унинг сўзларига кўра, уни урушга қатнашишга шимолий кореялик командирларнинг “Украина сафида жанубий кореялик жангчилар ҳам бор” деган баёнотлари илҳомлантирган.

2024 йил ноябрида Пек ва бошқа шимолий кореялик аскарлар поезд орқали Россиянинг Шарқий ҳудудларидан бирига олиб келинган. У ерда унга Россия армиясининг формаси ва жиҳозлари, шунингдек, рус ҳарбий билети берилган. Пек Россияга келганини фақат етиб келганидан сўнг тушунганини айтган.

Улар Украина ҳарбийлари томонидан асирга олинганидан сўнг, ҳозирда Киевда даволанмоқда ва Жанубий Кореяга қочиш имкониятини кўриб чиқмоқда. Расмий Сеул ҳам уларни қабул қилишга тайёрлигини билдирган.

“Уларнинг гувоҳликлари Шимолий Корея ҳарбий кучларидаги қаттиқ тартиб-интизом ва мафкуравий тарбияни очиб беради. Пек ва Ри оғир шароитларда турли қийноқлар ва катта йўқотишларга дуч келганликларини таъкидлашди”, – дейилади WSJ хабарида.

• Ҳарбий хизматчилар
• Janubiy Koreya
• КХДР
• Россия
• Украина