Латвия 11 августдан Беларус билан чегарада кучайтирилган хавфсизлик режимини жорий қилади. Бу ҳақда Латвия ҳукумати сайти хабар бермоқда.

“8 август куни Вазирлар Маҳкамаси чегара хизматининг 2023 йил 11 августдан 2024 йилнинг 10 февралига қадар Лудза, Краслава, Аугшдаугава округлари ва Даугавпилс маъмурий ҳудудларида олти ой муддатга кучайтирилган иш фаолиятини эълон қилди”, — дейилади хабарда.

Таъкидланишича, бу ҳудудлар Беларус билан чегарадош.

“Буйруқ давлат чегараси дахлсизлигини таъминлаш ва давлатга нисбатан содир этилиши мумкин бўлган таҳдиднинг олдини олиш мақсадида, шунингдек, Латвия-Беларус чегарасини ноқонуний кесиб ўтиш ҳолатлари, бундай кесиб ўтишга уринишлар ва уларнинг кўпайиши тенденциясини ҳисобга олган ҳолда чиқарилди”, – дейди Латвия вакили.

Шунингдек, ҳукумат "бутун минтақа давлатларининг Беларус билан чегараларини тенг даражада ҳимоя қилиш учун давлат чегарасини ноқонуний кесиб ўтишга уринишларга қарши ягона ва мувофиқлаштирилган халқаро ҳаракатларни таъминлаш жуда муҳим", – деб қўшимча қилди.

• Беларусь
• Латвия