Бугун ушбу мавсум стартидан янги форматда бўлиб ўтаётган Европа Чемпионлар Лигаси доирасида 5-турнинг қолган учрашувлари давом эттирилади. Аҳамиятлиси, турнинг марказий баҳси дея эътироф этилаётган учрашувда турнирнинг амалдаги чемпиони “Реал Мадрид” ва бу мавсум мусобақада ҳозирча очко йўқотмаган ягона жамоа – “Ливерпул” ўзаро тўқнаш келади.

Турнир жадвалига назар соладиган бўлсак, мавсумни бирмунча муаммолар билан бошлаган ва жароҳатлар гирдобида қолиб кетаётган “қаймоқранглилар” иккита ғалаба ва шунча мағлубият билан 6 очко жамғарган ҳолда 21-ўринда бормоқда. Англия жамоаси АПЛдаги сингари ЧЛда ҳам барқарор ўйинлар ўтказяпти ва 4 та турдан сўнг максимал 12 очко тўплаб 3-ўринда (бугунги баҳсдан сўнг пешқадамликка қайтиши мумкин) .

Жамоалар ЧЛ доирасида жами 11 бора тўқнаш келишган. 7 та баҳсда Мадрид клуби устун келган бўлса, мерсисайдликлар ҳисобида 3 та ғалаба бор ва бир ўйин дурранг билан якунланган.

Ушбу клубларнинг охирги 3 та қарама-қаршилигида қуйидаги ҳисоблар қайд этилган:

“Реал Мадрид” 1-0 “Ливерпул”;

“Ливерпул” 2-5 “Реал Мадрид”;

“Ливерпул” 0-1 “РеалМадрид”.

Кўриб турганингиздек “Ливерпул” анчадан буён “Реал”ни юта олмаяпти, бугун улар реванш олишга уриниб кўришади.

Эслатиб ўтамиз, жамоаларнинг навбатдаги учрашуви “Энфилд” аренасида 28 ноябрга ўтар кечаси Тошкент вақти билан соат 01:00 да старт олади.

• Чемпионлар Лигаси
• Liverpul
• Real