Япония бош вазири Фумио Кисида БМТ Бош Ассамблеясида сўзлаган нутқида Шимолий Корея етакчиси Ким Чен Ин билан “исталган вақтда ва ҳеч қандай шартларсиз” шахсан учрашишга тайёрлигини билдирди.

“Мен бу ерда раис Ким Чен Ин билан исталган вақтда ва ҳеч қандай шартларсиз юзма-юз учрашишга тайёр эканлигимни билдирмоқчиман”, – деди Япония ҳукумати раҳбари.

Кисида Япония КХДР билан муносабатларни нормаллаштириш ва икки давлат ўртасидаги мавжуд муаммоларни, жумладан, ўғирлаб кетилган Япония фуқаролари ва Пхеньяннинг ядровий ракета дастури билан боғлиқ муаммоларни тўлиқ ҳал қилишга интилаётганини қўшимча қилди. Япония бош вазири, шунингдек, КХДР билан биргаликда Япония-Шимолий Корея муносабатларининг “янги даврини” очишга тайёрлигини маълум қилди.

Кисида сўнгги йилларда ўзидан олдинги раҳбарлар сингари Шимолий Корея разведкаси томонидан ўғирлаб кетилган Япония фуқаролари муаммосини ҳал қилиш учун Ким Чен Ин билан шахсан учрашишга тайёрлигини бир неча бор таъкидлаган.

КХДР разведка хизматлари томонидан японларнинг ўғирлаб кетилиши мавзуси икки давлат ўртасидаги муносабатлардаги энг оғриқли мавзулардан бири ҳисобланади. 2002 йилда Пхеньян илк бор бор-йўғи 13 нафар япон фуқароси ўғирлаб кетилганини тан олди ва улардан беш нафарига ўз ватанларига қайтишга рухсат берди.

Қолганлари ўлган деб эълон қилинди ва ўлиги қариндошларига жўнатилди, уларнинг шахсини тасдиқлаб бўлмади. 2014 йил май ойида Япония ва Шимолий Корея ҳукуматлари япон фуқароларининг ўғирланиши бўйича янги тергов ўтказишга келишиб олдилар, бироқ бу билан шуғулланган комиссия кейинчалик Пхеньян ташаббуси билан тарқатиб юборилди.

Жанубий Корея ОАВлари аввалроқ КХДР ва Япония вакиллари июнь ойида учинчи мамлакатларда ўғирлаб кетилган Япония фуқаролари масаласини муҳокама қилиш учун камида иккита учрашув ўтказгани ҳақида хабар берган эди. Япония расмийлари буни расман тасдиқламади.

• Fumio Kisida
• Kim Chen In
• Шимолий Корея
• Япония