“Ижтимоий тармоқларда “Метрода касса ходимлари ёппасига ишдан бўшатилади” сарлавҳаси остидаги хабар тарқалмоқда.

Ҳолат юзасидан “Тошкент метрополитени” ДУК қуйидагиларни маълум қилади:

Барчага маълумки Тошкент метрополитенида тўловни амалга ошириш автоматлаштирилган тизимда олиб борилади. Сўнгги вақтларда йўловчилар томонидан бир марталик чипталарга бўлган талаб кескин камайиб кетди. Аввал хабар берганимиздек, айрим бекатларнинг биттадан вестибюлларидаги кассалар ёпилиб, унинг ўрнига автоматлаштирилган банкоматлар синов тариқасида ўрнатилди.

Шунингдек, йўл ҳақини ундиришнинг шаффофлигини таъминлаш мақсадида АТТО компанияси томонидан жамоат транспортларида ҳамда Тошкент метрополитени бекатларида  қуйидаги тўлов тизимлари жорий этилган: АТТО транспорт карталари;

Uzcard Duo ҳамда Humo банк карталари;

Visa ва MasterCard халқаро банк карталари;

Виртуал транспорт карталари;

Мобил иловалар орқали QR тўловлар;

FacePay тўлов тизими;

PalmPay тўлов тизими.

Бугунги кунга келиб, метрополитеннинг 23 бекатида йўл ҳақини нақд пулда тўловни амалга оширмоқчи бўлган фуқароларга 24 та ҚР-кодли чипта чиқариб берувчи инфокиосклар ўрнатилган. Бир маротабалик ҚР-кодли чиптанинг нархи метрополитен кассаларида ҳам, инфокиоскларда ҳам 3 000 сўм этиб белгиланган бўлиб, агар йўловчи томонидан 5 минг, 10 минг ёки ундан юқори бўлган купюралар киритилганда, қолган маблағ фуқаронинг мобил рақамининг ҳисоб рақамига қайтим сифатида ташлаб берилади. Шуни алоҳида таъкидлаш лозимки, жорий йилнинг якунига қадар метрополитеннинг барча бекатларига 200 та инфокиосклар ўрнатилиши режалаштирилган.

Метрополитенда автоматлаштирилган тизим ўрнатилиши сабабли, қисқаришга тушган ходимлар учун белгиланган тартибда тўрт ойлик лавозим иш ҳаққи миқдорида компенсация ва нафақалар тўлаб берилади. Бундан ташқари, лавозими қисқартирилаётган ходимларни келгусида иш билан таъминлаш мақсадида бухгалтерия, тикувчилик, қандолатчилик каби йўналишлардаги курсларида ўқиши учун харажатлар “Тошкент метрополитени” ДУК томонидан тўлаб берилади.

Юқоридагилардан келиб чиқиб ОАВ вакилларидан асосланмаган ва ёлғон маълумотларни тарқатмасликни сўраб қоламиз. Ҳамда бунинг учун Маъмурий жавобгарлик тўғрисидаги кодекснинг 202²-моддаси “Ёлғон ахборот тарқатиш”, шунингдек, Жиноий кодекснинг 244⁶-моддаси “Ёлғон ахборот тарқатиш” бўйича жавобгарлик мавжудлигини эслатиб ўтамиз” - дейилади хабарда.

• Ish
• Метро
• Metropoliten
• To'lov