Наманган вилоятида умумий қиймати 577,4 миллион сўм бўлган, сифатини тасдиқловчи ҳужжатларга эга бўлмаган 13 мингдан ортиқ қути дори воситаларининг ноқонуний муомалага киритилишининг олди олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Маълум қилинишича, тезкор тадбир давомида фуқаро А.Т. ва бошқалар “Бобуршоҳ” маҳалла фуқаролар йиғини ҳудудидаги хонадонда 56 турдаги 13 184 қути дори воситасини сотиш мақсадида сақлаб келгани аниқланган.

Дори воситаларининг умумий қиймати 577,4 миллион сўмни ташкил этган. Улар ашёвий далил сифатида олиб қўйилган.

Ҳолат юзасидан Жиноят кодексининг 186-3-моддаси билан жиноят иши қўзғатилган. Ҳозирда тергов ҳаракатлари олиб борилмоқда.

Эслатиб ўтамиз, аввалроқ Тошкент шаҳрида ҳам бир хонадонда Россиядан ноқонуний олиб келинган, қиймати қарийб 600 миллион сўмлик контрафакт дори воситалари сақланаётгани аниқланган эди.