АҚШ Сенати Россия ва Эронга қарши кенг қамровли санкцияларни назарда тутувчи “Линдсей O. Graham Sanctioning Russia and Iran Act of 2026” қонун лойиҳасини 86 овоз билан 11 та овозга қарши қабул қилди. Бу ҳақда Reuters хабар берди.

Қонун лойиҳаси Россия расмийларига қарши санкциялар жорий этиш ҳамда Россия нефти ва газига қарамликни камайтириш мақсадида Хитой, Ҳиндистон ва бошқа давлатларга нисбатан юқори бож тарифларини қўллаш ваколатини АҚШ президентига беришни назарда тутади.

Ҳужжатда, шунингдек, АҚШ президенти Доналд Трамп талаб қилган Эронга қарши санкцияларни кенгайтириш ҳам кўзда тутилган.

Агар қонун лойиҳаси АҚШ Вакиллар палатасида ҳам маъқулланиб, президент томонидан имзоланса, Россия энергетика ресурсларини йирик миқёсда сотиб оладиган давлатларга, жумладан, Ҳиндистон, Япония ва Европа Иттифоқининг айрим давлатларига нисбатан импорт тарифларини 100 фоизгача ошириш имконияти пайдо бўлади.

Бироқ айрим конгрессменлар ва саноат вакиллари янги тариф ваколатлари АҚШ импортчилари ва истеъмолчилари учун харажатларни ошириши мумкинлигидан хавотир билдирмоқда.

Қонун лойиҳаси энди Вакиллар палатасида кўриб чиқилади. Палата 31 август куни ёзги танаффусдан қайтиши кутилмоқда.

Эслатиб ўтамиз, республикачи сенатор Линдсей Граҳам Россияга қарши янги санкциялар тўғрисидаги қонун лойиҳаси устида ишлаган ва Россиянинг Украинага қарши урушида Киевнинг Конгрессдаги фаол тарафдорларидан бири бўлган. У ўтган ой бошида Киевга ташриф буюриб, Украина президенти Володимир Зеленский билан учрашган эди.