Ўзбекистон миллий терма жамоаси ва “Сурхон” клуби ҳимоячиси Беҳруз Каримов фаолиятини Швейсариянинг “Лугано” клубида давом эттиради. Бу ҳақда ЎзПФЛ хабар берди.

18 ёшли футболчи Тошкентда янги клуби учун тиббий кўрикдан ўтган ва шундан сўнг “Лугано” билан шартнома имзолаган.

Эндиликда Каримов Швейсарияда фаолият юритиши учун виза расмийлаштирилишини кутмоқда. Тегишли ҳужжатлар тайёр бўлгач, у Луганога йўл олади.

Швейсариянинг Cонтропиэде нашри ҳам “Лугано” 18 ёшли ўнг қанот ҳимоячисини “Сурхон” сафидан ўз таркибига қўшиб олганини хабар қилган. Клуб трансферни ҳали расман эълон қилмаган бўлса-да, футболчи шартномани имзолаб бўлган. Расмий баёнот яқин кунларда эълон қилиниши кутилмоқда.

Каримов “Одил Жуниор” академияси тарбияланувчиси ҳисобланади. У 2026 йилги Жаҳон чемпионатида Ўзбекистон миллий терма жамоаси сафида Португалия ва Колумбияга қарши учрашувларда майдонга тушган.

Футболчининг “Лугано”га трансфери жамоанинг ўнг қанот ҳимоячиси Маттиа Заноттининг келажаги борасидаги ноаниқликлар фонида амалга ошмоқда. Италиялик футболчининг бошқа клубга ўтиши кутилмоқда.

Айни пайтда “Лугано” Швейсария Суперлигасида икки турдан кейин 6 очко жамғариб, турнир жадвалида иккинчи ўринда бормоқда. “Ёунг Бойс” эса тўплар нисбатига кўра пешқадамлик қилмоқда.