Австрия канслери Кристиан Штокер фарзандларга ғамхўрлик қилишни иш сифатида баҳоламаслик ҳақидаги баёноти учун оналардан узр сўради. Бу ҳақда “Кронен Зеитунг” хабар берди.

Воқеа Штокернинг мамлакат бўйлаб сафари доирасида Залсбург шаҳрида ўтказилган учрашувда юз берган. Тадбирда аёллардан бири ёлғиз оналарни молиявий қўллаб-қувватлаш масаласи юзасидан канслерга савол берган. Унинг таъкидлашича, ёлғиз оналар фарзандларига қараш учун ҳафтасига ўртача 96 соат ҳақ тўланмайдиган меҳнат қилади.

Бунга жавобан Штокер болаларга қарашни “иш сифатида кўриб чиқмаган бўлардим”, деган. Шунингдек, у оилавий ҳаётни эвазига ҳеч қандай ҳақ олинмайдиган фаолият сифатида таърифлаган.

Канслернинг бу сўзлари ижтимоий тармоқлар ва сиёсий доираларда кескин танқидларга сабаб бўлди. “Яшиллар” партияси вакили Леоноре Гевесслер оналарнинг меҳнати қадрланиши ва улар масхарага эмас, узрга лойиқ эканини таъкидлади. Австрия Озодлик партияси раҳбари Герберт Кикл эса баёнотни “оналар устидан масхара” деб баҳолади.

Орадан бир ҳафта ўтиб, Штокер ўз сўзлари нотўғри бўлганини тан олди ва оналардан “шартсиз” узр сўради.

“Фарзандларга ғамхўрлик қилиш — бу меҳнат. Аксарият оилаларда болаларга қараш масъулиятининг асосий қисмини ўз зиммасига олаётган аёллар жуда муҳим ишни амалга оширмоқда”, — деди Австрия канслери.

Ушбу воқеа оиладаги бепул меҳнат ва болалар парваришининг жамиятдаги ўрни масаласида сиёсий баҳсларни кучайтирди.