Канада Бош вазири Марк Карни уй-жой сиёсатига бағишланган матбуот анжуманида телесуфлёр ишламай қолганидан сўнг АҚШ Президенти Доналд Трампга кинояли изоҳ берди. Воқеа давомида у вазиятни ҳазил билан қабул қилиб, нутқини тўхтатмасдан давом эттирди.

“Телесуфлёр ишлашдан тўхтади. Айрим дунё етакчиларидан фарқли ўлароқ, мен буни фитна деб ҳисобламайман”, дея таъкидлади Карни. Унинг бу сўзлари Трампнинг ўтган йили БМТ Бош Ассамблеясидаги чиқиши вақтида телесуфлёр носозлиги юз бергач, бу ҳолат бўйича текширув талаб қилганига киноя сифатида баҳоланди.

Ҳозирча Карни маъмурияти ҳам, Оқ уй ҳам ушбу баёнот юзасидан расмий изоҳ бермаган.

Сўнгги йилларда Канада ва АҚШ ўртасидаги муносабатлар кескинлашган. Доналд Трамп Канадага нисбатан янги бож тарифларини жорий этган ва мамлакат АҚШнинг 51-штатига айланиши кераклигини бир неча бор таъкидлаган. Марк Карни эса Трампнинг савдо сиёсатини танқид қилиб, Канаданинг иқтисодий ва дипломатик мустақиллигини мустаҳкамлаш тарафдори эканини билдириб келмоқда. У, шунингдек, халқаро майдонда йирик давлатларнинг иқтисодий интегратсиядан сиёсий босим воситаси сифатида фойдаланаётганини ҳам танқид қилган.