Украина Президенти Владимир Зеленский Киевда Озарбайжон Ташқи ишлар вазири Жайҳун Байрамовни қабул қилди. Бу Байрамовнинг Россия-Украина уруши бошланганидан буён Киевга амалга оширган илк ташрифи бўлди.

Учрашувда олий даражадаги дипломатик алоқалар, мудофаа соҳасидаги ҳамкорлик, шунингдек, энергетика, нефт, табиий газ ва қишлоқ хўжалиги йўналишларидаги иқтисодий ҳамкорлик масалалари муҳокама қилинди.

Жайҳун Байрамов ташриф давомида Киев яқинидаги Ирпин шаҳрида Озарбайжон кўмагида бунёд этилган мактаб, шифохона ва реабилитатсия марказини ҳам кўздан кечирди.

Озарбайжон Ташқи ишлар вазирлиги маълум қилишича, томонлар икки давлат ўртасидаги стратегик шерикликнинг бугунги ҳолати ва уни янада ривожлантириш истиқболларини ҳам муҳокама қилган. Хусусан, 2027-йилда Озарбайжон ва Украина ўртасида дипломатик муносабатлар ўрнатилганининг 35 йиллиги муносабати билан ҳамкорликни кенгайтириш муҳимлиги таъкидланган.

Учрашув давомида Байрамов Озарбайжоннинг Украинанинг халқаро тан олинган чегаралари доирасидаги суверенитети ва ҳудудий яхлитлигини қўллаб-қувватлашини яна бир бор тасдиқлади. Ўз навбатида, Президент Зеленский Озарбайжон Президенти Илҳом Алиев ва мамлакат ҳукуматига Украинага кўрсатилаётган гуманитар ҳамда энергетика соҳасидаги ёрдам учун миннатдорлик билдирди.