Ўзбекистонда 2026-йилнинг иккинчи чорагидан бошлаб уй-жой нархлари индексини ҳисоблашнинг янги методологияси жорий этилди. Миллий статистика қўмитаси маълумотига кўра, янги усул Халқаро валюта жамғармаси экспертлари кўмагида ишлаб чиқилган бўлиб, уй-жойларнинг майдони, жойлашуви, қавати, хоналар сони ва бошқа хусусиятларини ҳисобга олувчи гедоник регрессия усулига асосланади. Шунингдек, илк бор якка тартибдаги уйлар ҳам ҳисоб-китобларга киритилди.

Статистик маълумотларга кўра, 2026-йилнинг иккинчи чорагида Тошкент шаҳрида квартиралар нархи ўтган чоракка нисбатан 1,3 фоизга, йиллик ҳисобда эса 3,9 фоизга ошган. Янги қурилган уйлардаги квартиралар нархи эса бир йил давомида 5 фоизга қимматлашган.

Шу билан бирга, пойтахтдаги якка тартибдаги уйлар нархи биринчи чоракка нисбатан 0,7 фоизга пасайган. Бироқ уларнинг қиймати ўтган йилнинг шу даврига нисбатан 1,2 фоиз юқорилигича қолган. Ҳудудларда эса уй-жойлар нархи чорак давомида 2,8 фоизга ошган бўлса-да, йиллик ҳисобда 2,7 фоизга камайган.

Ҳисоботга кўра, бирламчи бозорда уй-жой нархлари чорак давомида 0,7 фоизга, йиллик ҳисобда эса 7,1 фоизга ошган. Иккиламчи бозорда эса нархлар мос равишда 1,6 фоиз ва 4,2 фоизга кўтарилган.

Уй-жой нархлари индекси интернет эълонларида кўрсатилган нархлар асосида шакллантирилади ва амалда тузилган олди-сотди битимлари қийматини акс эттирмайди. Тошкент шаҳри бўйича маълумотлар тўлиқ ОЛХ.уз платформаси асосида йиғилса, ҳудудларда маълумотларнинг 48 фоизи ушбу манбадан, қолган қисми эса бошқа очиқ манбалардан олинади. 2026-йилнинг биринчи ярмида республика бўйича ҳар чоракда қарийб 150 мингта уй-жой эълони таҳлил қилинган.

Миллий статистика қўмитаси ҳозирча бирламчи ва иккиламчи бозорлар ҳамда ҳудудлар кесимида квадрат метрнинг ўртача нархларини эълон қилиш режалаштирилмаганини маълум қилди.