Қозоғистоннинг собиқ президенти Нурсултон Назарбоев фахрий сенатор мақомидан маҳрум этилди. Бу ҳақда журналистларга республика Сенати (парламент юқори палатаси) раиси Маулен Ашимбаев маълум қилди.

"Тахминан икки-уч ҳафта олдин регламентни қайта кўриб чиққач, Сенат регламентига тегишли ўзгартиришлар киритилиб, регламентдан фахрий сенатор унвонини олиб ташладик. Бизда ҳозир бундай институт йўқ. Халқимиз овоз берди. Июнь ойида бўлиб ўтган референдумда Биринчи Президент – Элбоши ҳақидаги нормалар Конституциядан чиқариб ташланган. Бу халқнинг қарори”, - деди Ашимбаев.

Бундан ташқари, Ашимбаев бунгача фахрий сенатор унвони 2019 йил май ойида фақат бир кишига — Қозоғистоннинг биринчи президентига берилганини таъкидлади.

"Фахрий сенатор" унвони энди қонунда йўқ. Дарҳол айтишим керак, Сенат регламентига ўзгартиришлар киритилган. Биз ушбу бандни қайта кўриб чиқиш ва ўзгартириш чоғида “фахрий сенатор” унвонини олиб ташладик. Унгача у фақат бир кишига берилган эди. Энди бундай унвон ҳеч кимга берилмайди Чунки ҳозир бизда бунга қонуний асос йўқ”, деб тушунтирди у.

Маълумот учун, Қозоғистонни қарийб 30 йил бошқарган Назарбоев 2019 йилнинг 20 мартида президентликдан истеъфога чиқди. Унинг лавозимига аввал Сенат раиси бўлган Қосим Жомарт Тўқаев тайинланди. Инаугурация чоғида у Назарбоевга фахрий сенатор мақомини бериш зарур, деб ҳисоблаганини айтганди.

2019 йил 6 июнь куни Назарбоевга ўша пайтда парламент юқори палатасини бошқарган тўнғич қизи Дариға фахрий сенатор белгиси ва гувоҳномасини топширди.

Қозоғистонда ўтган ёзда референдумда фуқаролар томонидан қўллаб-қувватланган конституцияга киритилган ўзгартириш ва қўшимчалар кучга кирди. Ўзгартиришлар қаторида мамлакатнинг асосий қонунидан биринчи президент ҳақидаги барча ҳаволаларни олиб ташлаш ҳам бор. Хусусан, Назарбоевнинг мақоми ва ваколатлари конституция ва тегишли конституциявий қонун билан белгиланиши ҳақидаги банд 46-моддадан чиқариб ташланди.

• Назарбаев
• Қозоғистон