“Пахтакор” футбол клубига португалиялик мутахассис Педро Морейра мураббий этиб тайинланди. Бу ҳақда 4 декабрь куни клубнинг келажакдаги режаларига бағишланган матбуот анжуманида маълум қилинди.

Янги бош мураббий билан шартнома “1+1” схемаси бўйича билан тузилган. Педро Морейрага тўртта ассистент ёрдам беради.

Матбуот анжуманида жамоа президенти Жаҳонгир Ортиқхўжаев 2022 йилнинг июнь ойидан буён жамоани бошқариб келаётган Максим Шацких  лавозимидан озод этилгани ва энди клуб раисининг маслаҳатчиси сифатида ишлашини айтиб ўтди.

“Биз Максим Шацкихга миннатдорчилик билдирамиз. Шацких клубдан кетмади, бу истеъфо эмас. У бош мураббий лавозимидан кетди, лекин директорлар кенгашида менинг маслаҳатчим бўлиб қолмоқда”, — деди жамоа президенти.

Янги мураббий олдига чемпионлик вазифаси қўйилган. Мутахассиснинг шартномасида маошини ошкор қилишни тақиқловчи банд кўрсатилган.

“У қандай бўлишидан қатъи назар, ҳалол ишлаши керак. Унинг ишига ҳеч ким аралашмаслиги керак. Биз уни ўзбеклаштириб, бир ҳафтадан кейин чойхонадан чиқолмайдиган қилиб қўймаслигимиз керак”, — деди Ортиқхўжаев.

• Ортиқхўжаев
• Пахтакор
• murabbiy